केपी शर्मा ओलीको गाउँ जाँदै प्रचण्ड

विराटनगर । नेकपा माओवादी केन्द्रका अध्यक्ष पुष्पकमल दाहाल प्रचण्ड आज र भोलि तेह्रथुम रहने भएका छन् । तेह्रथुमका विभिन्न स्थानमा आयोजित कार्यक्रममा सहभागी हुनेछन् ।

प्रचण्डसँगै माओवादी केन्द्रका उपमहासचिव वर्षमान पुन पनि आउनेछन् ।

आज लालीगुराँस नगरपालिका–७ लसुनेस्थित शहीद धनरुपा पार्क प्रचण्डले उदघाटन गर्नेछन् । त्यसपछि उनी एमाले अध्यक्ष केपी शर्मा ओलीको जन्मथलो आठराई पुग्नेछन् ।

प्रचण्डले आठराई गाउँपालिका–३ ह्वाकु बगाले शहीद स्मृति पार्क र सोही स्थानमा जनयुद्ध तथा शान्ति संग्रहालय भवनको शिलान्यास गर्ने कार्यक्रम छ ।

उनी आज राति आठराई–६ चुहानडाँडा बजारमा बास बस्नेछन् । मंगलबार बिहान आठराई–६ मा पार्टी कार्यकर्ता, भेटघाट गर्नेछन् ।

दिउँसो तेह्रथुम बहुमुखी क्याम्पसको सभाहलमा पार्टीको तेह्रथुम जिल्लास्तरीय कार्यकर्तालाई राजनीतिक प्रशिक्षण दिएर उनी काठमाडौं फर्कने माओवादी केन्द्र तेहथुमका नेता रघु गौतमले जानकारी दिए ।