ताप्लेजुङ घटनाका घाइतेलाई काठमाडौं लगियो

विराटनगर । ताप्लेजुङको फुङलिङ नगरपालिका– ११ पाथीभरा मन्दिर क्षेत्रमा भएको झडपमा परी घाइते भएकालाई थप उपचारका काठमाडौं लगिएको छ । आइतबार विराटनगर विमानस्थलबाट तीन जनालाई नेपाली सेनाको हेलिकप्टरमा काठमाडौं लगिएको हो ।

झडपमा आन्दोलनकारी र सुरक्षाकर्मी गरेर २६ जना घाइते भएका थिए । जसमा तीन जना गम्भीर थियो । तीन मध्ये दुई जनालाई गोली लागेको थियो ।

उपचारका लागि ताप्लेजुङबाट आइतबार बिहान मात्रै विराटनगरको नोबेल शिक्षण अस्पताल ल्याइएको तेह्रथुमको म्याङलुङ नगरपालिका–९ का यामबहादुर लिम्बू, पाँचथरको मिक्लाजुङ गाउँपालिका–५ का सुगन लावती र ताप्लेजुङको फुङलिङ नगरपालिका–८ का धर्म (धर्माान) पालुङ्वालाई नेपाली सेनाको हेलिकप्टर मार्फत काठमाडौं पठाइएको हो । सगुनको छाती र यामबहादुरको तिघ्रामा गोली लागेको छ । धर्मको कुमको हड्डी भाँचिएको छ ।

ताप्लेजुङको फुङलिङ नगरपालिका–११ बलुडाँडामा शनिबार नो केबलकार पक्ष र प्रहरीबीच २ पटक झडप भएको थियो । झडपमा ५ जना आन्दोलनकारी र २१ जना सुरक्षाकर्मी घाइते भएको प्रहरीको दाबी छ ।

चन्द्र ढकालको समूहले पाथिभरामा मंगलबारबाट केबलकार निर्माणको काम सुरु गरेको थियो । त्यसको विरोधमा आजबाट आन्दोलन गर्ने भन्दै पहिचान पक्षधर बलुडाँडामा भेला भएका थिए । शनिबार प्रहरीले रोक्न खोज्दा झडप भएको थियो ।