ताप्लेजुङमा प्रहरीले गाेली चलायाे, दुई जना घाइते

विराटनगर । प्रहरीले ताप्लेजुङको फुङलिङ नगरपालिका– ११ पाथिभरा क्षेत्रमा केबलकार निर्माणको विरोधमा उत्रिएको समूहमाथि गोली प्रहार गरेको छ । ‘नो केबलकार समूह’सँगको झडपका क्रममा प्रहरीले गोली चलाएको हो ।

प्रहरीले चलाएको गोली लागेर दुई जना गम्भीर घाइते भएका छन् । ताप्लेजुङका प्रमुख जिल्ला अधिकारी नेत्रप्रसाद शमाका अनुसार पाथिभरा क्षेत्रको बलुडाडा आसपास सुरक्षाकर्मी र केबलकार विरोधी पक्षबीच झडप हुँदा करिब ६ बजे गोली चलेको हो ।

‘उनीहरुमाथि थिए, माथिबाट गुलेली र ढुंगा प्रहार भएपछि सुरक्षाकर्मीबाट फायरिङ भएको हो,’ उनले भने,‘ दुई जना घाइते छन् ।’

ताप्लेजुङमा पाथीभरा जाने केबलकार निर्माणका लागि निर्माण कम्पनीले मंगलबारबाट काम सुरु गरेको थियो । पहिचान पक्षधरले केबलकार निर्माण गर्दा पाथिभरा क्षेत्रको पहिचान मासिने भन्दै ‘नो केबलकार आन्दोलन’ गरिरहेको छ । आइतबारबाट आन्दोलन थप आन्दोलन गर्ने तयारी गरेको थियो ।

आइतबारबाट आन्दोलनका लागि भन्दै पहिचान पक्षधरहरु बलु डाडामा भेला भएका थिए । प्रहरी पुगेपछि आन्दोलनरत पक्षले गुलेली र ढुंगा प्रहार गरेपछि प्रहरीले गोली चलाएको थियो ।

शान्तिपूर्ण आन्दोलनको तयारी गर्दा राज्यले मान्छे ताकेर गोली प्रहार गरेको किराँत याक्थुङ चुम्लुङकी महासचिव निरन्ती तुम्बापोले बताइन् । उनका अनुसार भोलि आइतबारबाट आन्दोलन गर्ने तयारी छ ।