रित्तो गाग्रो बोकेर सिंहदरबारमा धरानका मेयर, प्रधानमन्त्रीलाई भेट्ने समय मिलेन

काठमाडौं । पानी माग्दै सुनसरीको धरान उपमहानगरपालिकाका मेयर हर्क साम्पाङ (हर्कराज राई) सिंहदरबार पुगेका छन् । मंगलबार रित्तो गाग्रो बोकेर पुगेका उनी प्रवेश नपाएपछि गाग्रो बाहिरै राखेर सिंहदरबार प्रवेश गरेका थिए ।

खानेपानी माग गर्दै उनले खानेपानीमन्त्री प्रदीप यादवलाई भेटेका छन् । अर्थमन्त्री विष्णु पौडेललाई पनि भेटेका छन् । उनले आजै प्रधानमन्त्री केपी शर्मा ओलीलाई पनि भेट्न खोजेका थिए । तर प्रधानमन्त्री ओलीको व्यस्त सेड्युलका कारण उनले भेट्न पाएनन् ।

साम्पाङ धरानका बासिन्दाले भोगिरहेको खानेपानी समस्या समाधानको माग लिएर मंगलबार मन्त्रालय पुगेका हुन् ।

भेटका क्रममा मन्त्री यादवसँग साम्पाङले बजेट व्यवस्था गर्न माग गरे । खानेपानी लागि आवश्यक जग्गा प्राप्तिको जिम्मा धरान उपमहानगरपालिकाले लिने र बाँकी काम संघीय सरकारले गर्नुपर्ने उनको माग छ । मन्त्री यादवले धरानको खानेपानी समस्याका विषयमा छलफल भएको बताए ।

‘म धरानवासीप्रति सधैं सकारात्मक छु,’ उनले भने,‘खानेपानीको समस्या समाधानका लागि एकीकृत खानेपानी आयोजनाअन्तर्गत एसियाली विकास बैंक (एडीबी)को ऋण सहयोगमा यस वर्षभित्र खानेपानी सम्बन्धी टेण्डर आह्वान गर्ने प्रतिबद्धता व्यक्त गरेको छु ।’