मोरङमा रोकिएन हात्तीको उपद्रो, एक महिनामा सुन्दरहरैँचामा तीन जनाको मृत्यु

विराटनगर । मोरङको सुन्दरहरैँचा नगरपालिकामा एक महिनामा हात्तीको आक्रमणबाट तीन जनाको मृत्यु भएको छ ।

पछिल्लो पटक शनिबार राति सुन्दहरैँचा – ८ का ७१ वर्षीय हरिप्रसाद घिमिरेको जङ्गली हात्तीको आक्रमणबाट मृत्यु भएको छ । गत पुस १७ गते सुन्दरहरैँचा ५ की चन्द्रकुमारी लिम्बूको मृत्यु भएको थियो । गत पुस ५ गते हात्तीको आक्रमणबाट सुन्दरहरैँचा नगरपालिका ७ की गङ्गा श्रेष्ठको मृत्यु भएको  थियाे ।

प्रहरीका अनुसार शनिबार राति घरमा हात्ती आएर उपद्रो मच्चाउन थालेपछि भाग्न खोज्दा हात्तीको आक्रमणमा परी घिमिरेको मृत्यु भएको थियो ।

सुन्दरहरैँचा नगरको उत्तरतर्फको सामुदायिक वनमा एक दर्जनभन्दा बढी जङ्गली हात्ती छन् । ती हात्ती रातको समयमा बस्ती पस्छन् । नगरप्रमुख केदारप्रसाद गुरागाईँले समुदायलाई आतङ्कित नहुन र सकेसम्म जङ्गली हात्तीबाट सुरक्षित रहन आग्रह गरेका छन् ।

गत पुस १७ गते जंगलबाट दाउरा लिएर आउँदै गर्दा सुन्दरहरैँचा–५ गुरुङ टोलका ६१ वर्षीया चन्द्रकुमारी लिम्बूको हात्तीको आक्रमणबाट मृत्यु भएको थियो ।
सुन्दरहरैँचा–७ स्थित सृजना सामुदायिक वनमा दाउरा खोज्न गएका बेला ४० वर्षीया गङ्गा श्रेष्ठको हात्तीको आक्रमणबाट मृत्यु भएको थियो ।

कोशी प्रदेशका झापा, मोरङ र सुनसरी जिल्लामा जङ्गली हात्तीले मानिसमाथि आक्रमण गर्ने, अन्नबाली नष्ट गर्ने तथा घर भत्काउने गरेको मोरङ डिभिजन वन कार्यालयले जनाएको छ । जङ्गली हात्तीको बथानले कोशी प्रदेशका झापा, मोरङ र सुनसरीलगायत जिल्लामा उपद्रो मच्चाइरहेको छ । सबैभन्दा धेरै झापा र मोरङमा मानवीय एवं भौतिक क्षति गरेको प्रहरीको भनाइ छ । पछिल्लो समय मोरङको बेलबारी, सुन्दरहरैँचा, केराबारीमा दैनिकजसो हात्तीको हुल देखिने गरेको छ ।