ग्रामथान पुगेर प्रचण्डले भने,‘अबकाे निर्वाचनमा माओवादी केन्द्र पहिलाे दल बन्छ’

विराटनगर । नेकपा माओवादी केन्द्रका अध्यक्ष पुष्पकमल दाहाल प्रचण्डले २०८४ को स्थानीय तह निर्वाचनमा माओवादी केन्द्र पहिलो दल बन्ने दाबी गरेका छन् ।

मोरङको ग्रामथान गाउँपालिकामा पुष्पलाल चाेक- विराटचाेक सडककाे आधाखण्ड अवरुद्ध गरी आयोजित धन्यवाद तथा खबरदारी सभालाई सम्बोधन गर्दै उनले माओवादी पहिलो पार्टी बन्ने बताएका हुन् ।

गत मंसिर १५ मा भएको उपनिर्वाचनमा ग्रामथान माओवादी केन्द्रले जितेको थियो । पालिकामा धन्यवाद दिन आएका प्रचण्डले जनतामा माओवादीप्रति उत्साह जागेको दाबी गर्दै २०८४ को निर्वाचनमा पहिलो दल बन्ने बताएका हुन् ।

‘हामी १ सय २२ ठाउँमा स्थानीय तहमा जितेका थियौं । गएको उपनिर्वाचनमा ग्रामथानले त्यसलाई १ सय २३ ठाउँ पुगेको छ,’ प्रचण्डले भने, ‘अब त्यो १ सय २३ लाई हामी २ सय ५० बनाउनेछौं । अबको निर्वाचनमा माओवादी पहिलो दल बन्नेछ । यसमा कसैले रोक्न सक्दैन ।’

गत मंसिर १६ को उपनिर्वाचनमा ग्रामथानबासीले माओवादी केन्द्रलाई ठूलो गुण लगाएको बताउँदै उनले अब आउने चुनावमा २०६४ कै अवस्थामा फर्काउन आग्रह गरे ।

‘हामीले २०६४ मा जनताको मत पाएर पनि पार्टीलाई एकताबद्ध राख्न सकेनौं, जनताको विश्वास कायम राख्न नसकेकै हौं,’उनले भने,‘त्यतिबेलाको जनमत र आजको जस्तो हाम्रो सुझबुझपूर्ण चेतना र शैली मिल्यो भने अब हामी नेपाललाई राजनीतिक परिवर्तनको पूर्ण अनुभूति गराउने छौं, हामी धेरै कुरा सम्झेर तपाइँहरुसमक्ष आएका छौं, तपाईहरुलाई पनि २०६४ साल सम्झिदिन अपिल गर्दछु ।’