विराटनगर विमानस्थलको टर्मिनल भवन : दुई वर्षमा आधा काम

विराटनगर । विराटनगर विमानस्थलको नयाँ टर्मिनल भवन निर्माण भइरहेको छ ।

दुई वर्षअघि निर्माण सुरु भवनको काम आधा भन्दा कम सकिएको छ । भवन बनेपछि प्रयोगमा रहेको ६० वर्ष पुरानो टर्मिनल भवन भत्काइनेछ । अहिले टर्मिनल रहेकाे स्थानलाई पार्किङ वे बनाउने तयारी छ ।

नेपाल नागरिक उड्डयन प्राधिकरणले ३ अर्ब १२ करोड रुपैयाँ लागतमा अत्याधुनिक र सुविधासम्पन्न टर्मिनल भवन निर्माण गरिरहेको हो ।

टर्मिनल भवनपछि धावनमार्ग विस्तार हुनेछ । प्राधिकरणका इन्जिनियर सञ्जीव खड्काका अनुसार दुई वर्षमा ४५ प्रतिशत हाराहारीमा काम सकिएको छ । अबको एक वर्ष अर्थात आगामी २०८२ पुसभित्र निर्माण सक्ने लक्ष्य छ ।

टर्मिनल भवन निर्माणको ठेक्का केसी, डाँफे जेभीले पाएको थियो । १६ हजार ५ सय ९० वर्ग मिटर क्षेत्रफलमा निर्माण भइरहेको भवनमा १७ वटा टिकट काउन्टर, २४ वटा पसल, चारवटा रेस्टुरेन्ट, सम्मेलन कक्ष, तीनवटा भीआईपी कक्ष, बाल उद्यान, स्तनपान कक्षजस्ता सुविधा हुनेछ ।