दुई जिल्लामा रविले बुझाए १ करोड २५ लाख धरौटी

काठमाडौं । राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेले सहकारी ठगी मुद्दामा दुई जिल्लामा एक करोड २५ लाख धरौटी बुझाएका छन् ।

कास्की र काठमाडौं जिल्ला अदालतमा सहकारीको बचत अपचलन मुद्दामा उनले एक करोड २५ लाख धरौटी बुझाएका हुन् ।

बिहीबार सूर्यदर्शन सहकारीको बचत अपचलन, संगठीत अपराध र सम्पति शुद्धिकरण मुद्दामा लामिछाने ६५ लाख धरौटी बुझाएर छुटेका थिए ।

आइतबार स्वर्णलक्ष्मी बचत तथा ऋण सहकारी संस्थाको बचत अपचलन मुद्दाको बयानका लागि हाजिर भएका लामिछाने थुनछेक बहसपछि बुधबार ६० लाख धरौटी बुझाएर छुटे छन् ।

उनीविरुद्ध अब रुपन्देही, चितवनमा पनि सहकारी ठगीको अनुसन्धान भइरहेको छ ।

इलाका प्रहरी कार्यालय, बुटवलले अनुसन्धान गरेर रायसहितको अनुसन्धान प्रतिवेदन सरकारी वकिलको कार्यालयमा बुझाइसकेको छ । जिल्ला प्रहरी कार्यालय, चितवनले पनि उनी जोडिएको साहारा चितवन सहकारी प्रकरणमा अनुसन्धान गरिरहेको छ ।

बुधबार काठमाडौंको स्वर्णलक्ष्मी सहकारीमा बचतकर्ताले राखेको १ अर्ब १९ करोड रुपैयाँ अनियमितता प्रकरणमा रास्वपा सभापति लामिछाने ‘कसुरदार छैनन् भन्न सकिएन’ भन्दै धरौटीमा छाड्न काठमाडौं जिल्ला अदालतले आदेश दिएको थियो ।

जिल्ला अदालत, काठमाडौंका न्यायाधीश माधवप्रसाद अधिकारीले आदेश गरेसँगै त्यस बराबरको बैंक ग्यारेन्टी बुझाएर लामिछाने हिरासतमुक्त भएका थिए । पोखरामा पनि उनी बैंक जमानत बुझाएर छुटेका थिए ।

लामिछानेले बुधबार छुटेपछि न्यायालयलाई धन्यवाद दिएका छन् । ‘न्याय प्रक्रियालाई सघाउन आएको भनेको थिएँ । अदालतप्रति एकदमै सम्मान व्यक्त गर्न चाहन्छु’, उनले भनेका छन्, ‘न्यायप्रेमी जनतालाई धन्यवाद दिन चाहन्छु ।’