धनकुटामा पिकअप भ्यान दुर्घटना हुँदा दुई जनाको मृत्यु

धनकुटा । धनकुटामा पिकअप भ्यान दुर्घटना हुँदा २ जनाको मृत्यु भएको छ ।

पाख्रीबास–हिले सडक खण्डअन्तर्गत पाख्रीबास नगरपालिका–३ जौटारमा बिहीबार राति करिब ९ बजेतिर दुर्घटना हुँदा पिकअप चालक पाख्रीबास– ९ उत्तरपानीका ३९ वर्षीय शुक्रबहादुर तामाङ र सहचालक सिरहाको लाहान नगरपालिका–५ का २४ वर्षीय प्रमोद मल्लिकको मृत्यु भएको हो ।

सहचालक मल्लिकको घटनास्थलमै र चालक तामाङको जिल्ला अस्पताल धनकुटा पुर्याउनसाथ मृत्यु भएको जिल्ला प्रहरी कार्यालय धनकुटाका प्रवक्ता डीएसपी ओमप्रकाश खनालले जानकारी दिए ।

३ वटा सुँगुर लिएर पाख्रीबासबाट हिलेतर्फ जाँदै गरेको को १ ज २६३९ नम्बरको पिकअप सडकबाट करिब १ सय ५० मिटर तल खसेको थियो ।