अमेरिकाको लसएन्जलसमा फैलिएको डढेलो नियन्त्रण बाहिर, सात जनाको मृत्यु

काठमाडौं । अमेरिका क्यालिफोर्निया राज्यको लसएन्जलस शहरमा फैलिएको डढेलो नियन्त्रण बाहिर छ । प्यासिफिक प्यालिसेड्स भन्ने स्थानबाट मंगलबार बिहानबाट सुरु भएको डढेलो नियन्त्रण भएको छैन ।

डढेलाेमा परी मृत्यु हुनेको संख्या ७ पुगेको छ । बीबीसीका अनुसार एक लाख भन्दा बढी व्यक्ति घर छाड्न बाध्य भएका छन् ।

हेलिकप्टर र दमकलबाट समेत आगो निभाउने प्रयास जारी रहे पनि तिव्र हावा रहेका कारण सफल भएको छैन । डढेलोले लसएन्जलस शहरका कयाैं घर, पसल, स्कुल, प्रार्थनास्थल, होटल जलेको छ । आगो फैलिएपछि निभाउने पानीको समेत अभाव हुन थालेको बीबीसीले जनाएको छ । सरकारले स्थानीयबासीलाई पानी जोगाउन अपिल गरेको छ ।

लसएन्जलसमा डढेलोसँगै लुटपाटका घटना पनि बढेका छन् । लुटपाटमा संलग्न २० जनालाई प्रहरीले पक्राउ गरेको छ ।

बीबीसीका अनुसार अमेरिकामा डढेलो भयानक हुनुका पछाडि तीव्र गतीकाे हावा हाे । यो मौसममा दक्षिणी क्यालिफोर्नियामा तीव्र वेगमा हावा चल्ने गर्दछ । यसलाई ‘सेन्टा ऐना विन्ड्स’ भनिन्छ । यो हावा सामान्यतया १०० देखि ११० किलोमिटर प्रतिघण्टाको वेगमा दक्षिणी क्यालिफोर्नियाबाट भित्री इलाका हुँदै समुद्री तटतर्फ अगाडि बढ्दछ । हावाको वेगले आगोलाई छिटो जताततै फैलाएको बताइएको छ । विगतमा पहाडी तथा जंगल क्षेत्रमा फैलने आगो यो पटक तीव्र गतिको हावाकै कारण शहरी क्षेत्रमा आगो फैलिएको बीबीसीले जनाएको छ ।