ऋषिकेश पाेखरेलका पूर्वस्वकीय सचिवलाई पाँच दिन हिरासतमा राख्न अनुमति

विराटनगर । जिल्ला अदालत माेरङले प्रतिनिधिसभाको सार्वजनिक लेखा समितिका सभापति एवं नेकपा (एमाले)का नेता ऋषिकेश पोखरेलका पूर्वस्वकीय सचिव अनिलकुमार पोखरेललाई पाँच दिन हिरासतमा राखेर अनुसन्धान गर्न अनुमति दिएकाे छ ।

 जिल्ला अदालत मोरङका न्यायाधीश पारसमणि पोखरेलको इजलासले ५ दिन हिरासतमा राखेर अनुसन्धान अघि बढाउन प्रहरीलाई अनुमति दिएको हो ।

 ठगी मुद्दाको अनुसन्धानका लागि प्रहरीले अदालतबाट म्याद लिएको हो । एमबीबीएसमा भर्ना हुनका लागि नाम निकालिदिने भन्दै  ३८ लाख ८० हजार रूपैयाँ ठगी गरेको आरोपमा मोरङको रंगेली नगरपालिका–२ घर भइ काठमाडौं बस्दै आएका ४३ वर्षीय अनिल बिहीबार पक्राउ परेका थिए ।

ठगी गरेको विषय बाहिरिएपछि ऋषिकेशले अनिललाई जिम्मेवारीबाट हटाएका थिए । अदालतबाट पुर्जी जारी गरेर उनलाई पक्राउ गरिएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए ।

एमबीबीएसमा छोरीको नाम निकालिदिने भन्दै सप्तरीको अग्नीसाईर कृष्णासवरन गाउँपालिका– ५ बकधुवाका ५७ वर्षीय बौआलाल चौधरीसँग विभिन्न मितिमा रकम लिएको आरोप अनिल पाेखरेलमाथि छ ।

 सहकारी ठगी आरोपमा फरार रहेकी ऋषिकेशकी पत्नी अञ्जला कोइराला बुधबार मोरङ अदालतमा हाजिर भएकी थिइन् । अदालतको आदेशपछि उनी बुधबार नै १० लाख धरौटी बुझाएर छुटेकी थिइन् ।