अदालतको आदेशपछि धरौटी बुझाएर छुटे रवि लामिछाने

पोखरा । सूर्यदर्शन सहकारीको बचत रकम अपचलन मुद्दाका प्रतिवादी राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछाने कास्की जिल्ला अदालतको आदेशपछि धरौटी बुझाएर छुटेका छन् ।

जिल्ला न्यायाधीश नितिज राईको इजलासले सहकारी ठगी, संगठित अपराध र सम्पति शुद्धिकरण मुद्दामा लामिछानेलाई ६५ लाख धरौटीमा छाड्ने आदेश दिएको थियो । अदालतको आदेशपछि बैंक ग्यारेन्टी मार्फत धरौटी बुझाएर लामिछाने छुटेका हुन् ।

लामिछानेसँगै छविलाल जोशी, रामबहादुर खनाल, कृष्णबहादुर गुरूङ, मीना गुरुङ र आरती गुरूङले धरौटी रकम बुझाएको कास्की जिल्ला अदालतका स्रेस्तेदार राजन खनालले जानकारी दिए ।

न्यायाधीश राईको इजलासले लामिछानेलाई ६५ लाख, छविलाल जोशीलाई ८८ लाख, लीला पछाईंलाई ३७ लाख, मीना गुरुङलाई पाँच लाख, रामबहादुर खनाललाई १५ लाख, आरती गुरुङलाई पाँच लाख र कृष्णबहादुर गुरुङलाई एक लाख धरौटीमा रिहा गर्न आदेश दिएको थियो ।

लामिछानेविरूद्ध काठमाडौं जिल्ला अदालतमा पनि सहकारी ठगी सम्बन्धी अर्को मुद्दा छ । उनी काठमाडौं अदालतमा भने आफै उपस्थित हुने सर्तमा प्रहरीले छाडेकाे हाे ।