तिब्बतमा भूकम्प : मृतकको संख्या १२६ पुग्यो, १८८ जना घाइते

विराटनगर । चीनको तिब्बतमा मंगलबार बिहान गएको शक्तिशाली भूकम्पमा परी मृत्यु हुनेको संख्या १ सय २६ पुगेको छ ।चिनियाँ समाचार संस्था सिन्हवाका अनुसार भूकम्पमा परी १२६ जनाकाे मृत्यु भएकाे हाे । १ सय ८८ जना घाइते भएका छन्  ।

चीनको सिजाङ स्वशासित क्षेत्रको डिङ्ग्री काउन्टीमा स्थानीय समयानुसार मंगलबार बिहान ९ः०५ बजे भूकम्प गएको हो । भूकम्प मापनसम्बन्धी चीनको आधिकारिक निकाय ‘चाइना अर्थक्वेक नेटवर्क्स सेन्टर’ का अनुसार ६‍‍.८ म्याग्निच्युडको भूकम्प गएको छ ।

नेपालको उत्तरपूर्वी सीमा नजिकै चीनको सिजाङ स्वशासित क्षेत्रको डिङ्ग्री काउन्टी केन्द्र भएर भूकम्प गएको थियो । भूकम्पका कारण पूर्वी नेपालका पहाडी जिल्लाहरुमा क्षति पुगेको छ । भूकम्पको केन्द्रबिन्दु नेपालबाट करिब ९३ किलोमिटर टाढा थियो ।

भूकम्पको धक्का नेपाल, भारत,बंगलादेश र भुटानका विभिन्न स्थानमा पनि महसुस भएको थियो । नेपालमा स्थानीय समयानुसार बिहान ६ बजेर ५० मिनेटमा महसुस गरिएको थियो ।