तिब्बतमा शक्तिशाली भूकम्प : मृतककाे संख्या ५३ पुग्याे

विराटनगर । मंगलबार बिहान चीनको तिब्बतमा गएको भूकम्पमा परी मृत्यु हुनेको संख्या ५३ पुगेको छ, ६२ जना घाइते भएका छन् ।

चिनियाँ समाचार संस्था पिपल्स डेलीका अनुसार  ५३ जनाको मृत्यु भएको छ ।

नेपाली समय अनुसार बिहान ६:५० मा तिब्बतकाे सिजाङ अटोनोमस रिजनको डिंग्री काउन्टी केन्द्रबिन्दु भएर ६.८ म्याग्निच्युडको भूकम्प गएको हो ।

नेपालको राष्ट्रिय भूकम्प मापन केन्द्रले भने भूकम्पको तीव्रता ७ म्याग्निच्युड रहेको बताएको छ ।

भूकम्पले केन्द्रबिन्दु आसपासकाे गाउँमा धेरै क्षति पुगेको छ ।

तिब्बतमा गएकाे भूकम्पको धक्का नेपालभर महसुस गरिएको थियो ।

भूकम्पबाट नेपालमा भने हालसम्म कुनै मानवीय क्षति नभएको राष्ट्रिय आपत्कालीन कार्यसञ्चालन केन्द्रले जनाएको छ ।

पूर्वी नेपालमा भूकम्पाको ठूलो धक्का महसुस भएको थियो । कडा धक्का महसुस भएको जिल्लामा मानवीय क्षतिको विवरण प्राप्त भएको छैन ।