एमाले र माओवादी केन्द्रकाे केन्द्रीय कमिटी बैठक आज

विराटनगर । नेपाल कम्युनिष्ट पार्टी माओवादी केन्द्र र नेकपा एमालेकाे केन्द्रीय  कमिटी बैठक आजबाट सुरु हुँदैछ ।

एमालेकाे बैठक बिहान ११ बजे सुरु हुनेछ ।  माओवादी केन्द्रकाे बैठक पार्टी केन्द्रीय कार्यालय पेरिसडाँडामा आज दिउँसो १ बजे सुरु हुनेछ ।

माओवादी केन्द्रकाे बैठकमा अध्यक्ष पुष्पकमल दाहाल ‘प्रचण्ड’ले राजनीतिक तथा साङ्गठनिक प्रतिवेदन प्रस्तुत गर्नेछन् । बैठकमा प्रतिवेदनमाथि छलफल हुने पार्टी उपाध्यक्ष एवं प्रवक्ता अग्निप्रसाद सापकोटाले जानकारी दिए । यसअघि बसेको स्थायी समिति बैठकले अध्यक्ष दाहालबाट ‘पार्टी रुपान्तरण र पुननिर्माणको सङ्कल्पः आजको आवश्यकता’ शीर्षकको राजनीतिक प्रतिवेदन पेस हुने टुङ्गो लगाएको थियो ।

बैठकको प्रारम्भमा अध्यक्ष दाहालले पछिल्लो राजनीतिक परिस्थितिका बारेमा ‘ब्रिफिङ’ गर्ने र लगत्तै प्रस्तुत प्रतिवेदनमाथि छलफल हुनेछ ।

बैठकमा ४ सय ९ केन्द्रीय सदस्य, २ सय ५ वैकल्पिक केन्द्रीय सदस्य, तीन आयोगबाट ७५ तथा सात भौगोलिक र तीन गैरभौगोलिक गरी १० प्रदेशका पदाधिकारी १ सय २५ जना गरी ८ सय १४ जनाको सहभागी हुनेछन् ।

एमाले केन्द्रीय कमिटी बैठकमा पार्टी अध्यक्ष एवं प्रधानमन्त्री केपी शर्मा ओलीले राजनीतिक प्रतिवेदन प्रस्तुत गर्नेछन् ।

प्रतिवेदनमाथि केन्द्रीय सदस्यलाई बेग्लाबेग्लै धारणा राख्ने व्यवस्था मिलाइएको पार्टी उपाध्यक्ष सुरेन्द्र पाण्डेले जानकारी दिए । सदस्यलाई करिब तीन मिनेटको समय उपलब्ध गराइने छ ।

बैठकको प्रारम्भमा अध्यक्ष ओलीले पछिल्लो राष्ट्रिय राजनीतिक परिस्थितिका बारेमा मन्तव्य दिनेछन् ।  उनले प्रस्तुत  गर्ने राजनीतिक प्रतिवेदनमा आगामी कार्ययोजना, पार्टी सङ्गठन सुदृढीकरण, वर्तमान सरकार गठन, यसअघिका सरकारमा साझेदारी, सरकारका प्राथमिकता, संविधान संशोधन, आर्थिक सुधार, सहकारीलगायत विषय समेटिएका छन् । दुई दिनभित्र बैठक सक्ने तयारी छ ।