कटहरीमा हातखुट्टा बाँधिएको अवस्थामा भेटिइन् महिला, बलात्कारको आशंका

विराटनगर ।  मोरङको कटहरी एक महिला हातखुट्टा बाँधिएकाे अवस्थामा फेला परेकी छन् ।

मंगलबार दिउँसो  कटहरी गाउँपालिका– २ को धानखेतकाे बीचमा रहेकाे बास झ्याङ भित्र मुखमा पट्टी लगाएर हातखुट्टा बाँधिएको अवस्थामा २२ वर्षीय महिला  अवस्थामा भेटिएकी हुन् ।

जिल्ला प्रहरी कार्यालय मोरङका प्रवक्ता डिएसपी बेदप्रकाश जोशीका अनुसार हातखुट्टा बाधिएकाे र अचेत अवस्थामा भेटिएकी महिला जहदा गाउँपालिका– ३ की बासिन्दा हुन् ।

मंगलबार करिब ११ बजे पराल लिन गएकी महिलाले देखेपछि ति महिलाकाे उद्दार भएको हाे ।  घटनास्थलमा प्रहरी पुगेर बाँधेको डोरी खोलेर उपचारका लागि अस्पताल पठाएकाे थियाे ।

प्रहरीका अनुसार ऋषिदेव थरकी ति महिलाका दुई सन्तान छन् । उनी माइतमा बस्दै आएकी थिइन् । मंगलबार बिहान भने उनी घरबाट निस्किएकी थिइन् ।

‘घरबाट किन निस्किएको भन्दै खुलेको छैन, महिलाको शारिरीक अवस्था हेर्दा घटना शंकास्पद छ,’ उनले भने,‘ सबै कोणबाट अनुसन्धान भइरहेको छ ।’ डिएसपी जोशीका अनुसार महिलाले लगाएको कपडा च्यातिएका छन्, शरीरका केही भागमा निलडाम पनि छन् ।

प्रहरी स्रोतका अनुसार उनीमाथि हातखुट्टा बाँधेर जवरजस्ती करणी भएको जस्तो देखिन्छ । तर डिएसपी जोशी भने मेडिकल परीक्षणपछि मात्रै सो विषय खुल्ने दाबी गर्छन् ।

‘अहिले विभिन्न कोणबाट अनुसन्धान भइरहेको छ,’उनले भने,‘ १–२ दिनमा सबै विषय खुल्छ ।’  उनले महिलालाई हातखुट्टा बाँधेर छाड्नेको खोजी भइरहेको बताए ।