हुम्लामा हिमपात, अन्य क्षेत्रमा चिसाे बढ्याे

काठमाडौं । हुम्लामा हिमपात भएको छ । साेमबार रातिदेखि हिउँ परेकाे हाे ।

जिल्ला सदरमुकाम सिमिकोटमा दुई इञ्चसम्म हिउँ जमेको छ । उत्तरी नाम्खा गाउँपालिकासहित एक फिटसम्म हिउँ जमेको छ । जिल्लामा हिमपातसँगै चिसो अत्यधिक बढेको छ । प्रमुख जिल्ला अधिकारी नारायण पाण्डेयका अनुसार चिसोका साथै हिमपात हुँदा आवतजावतमा समेत समस्या भएको छ ।

पश्चिमी वायुको प्रभावका कारण हुम्लासहित अन्य हिमाली क्षेत्रमा हिमपात भएकाे छ । तराई क्षेत्रमा चिसाे बढेकाे छ । 

सोमबार साँझदेखि सुदूरपश्चिमबाट माैसम बदली विस्तारै पूर्वतिर फैलिँदै गएको जल तथा मौसम विज्ञान विभाग, मौसम पूर्वानुमान महाशाखाले जनाएको छ । महाशाखाका मौसमविद् रोजन लामिछानेका अनुसार  पूर्व सर्दै जाँदा वर्षा गराउन सक्ने प्रणाली कमजोर हुनेछ ।

आज राति उच्च पहाडी र हिमाली क्षेत्रमा हिमपात हुने र अन्य केही क्षेत्रमा वर्षा हुनसक्ने सम्भावना छ ।

महाशाखाले सार्वजनिक गरेको विवरणमा हाल देशमा पश्चिमी वायुको प्रभाव रहेका तथा सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशमा पश्चिमी न्यूनचापीय प्रणालीको प्रभाव हुने देखिएको छ ।