निगमसँग मिलेर प्लेन खरिदको तयारी गर्दै प्रदेश सरकार

काठमाडौं । कोशी प्रदेश सरकारले नेपाल वायुसेवा निगम मिलेर नयाँ जहाज किन्नेबारे विषयमा छलफल गरेको छ ।

प्रादेशिक हवाई उडान सञ्चालनका लागि निगम कार्यकारी अध्यक्षसहित टोलीले कोशी प्रदेशका मुख्यमन्त्री हिक्मतकुमार कार्कीसँग छलफल गरेको हो ।

निगमका प्रवक्ता रमेश पौडेलका अनुसार कोशी प्रदेशको पर्यटन विकास तथा प्रादेशिक हवाई यातायातलाई सुलभ बनाउन निगमसँगको सहकार्यमा प्रादेशिक हवाई उडान सम्बन्धी कार्य अघि बढाउनेबारे छलफल भएको हो ।

कोशी प्रदेश सरकार र निगमले नयाँ जहाज खरिद, सञ्चालन तथा व्यवस्थापनका सन्दर्भमा उपयुक्त मोडालिटी तय गर्नेबारे समेत छलफल भएको निगमले जनाएको छ ।

छलफलमा कोशी प्रदेशका मुख्यमन्त्री समक्ष निगम टोलीले प्रादेशिक हवाई उडान व्यवस्थित गरी कोशी प्रदेशको हवाई उडान र पर्यटन विकास अवधारणा प्रस्तुत गरेको थियो ।