चार महिनामा ६ लाख किलो छुर्पी विदेश निर्यात

काठमाडौं । चालु आर्थिक वर्षको ४ महिनामा नेपालबाट ६ लाख २१ हजार ७ सय ४७ किलो छुर्पी विदेश निर्यात भएको हो । निर्यातबाट १ अर्ब १५ करोड रुपैयाँ भित्रिएको छ ।

भन्सार विभागको तथ्यांक अनुसार नेपालबाट अमेरिका, क्यानडा, ब्राजिल, चीन, ग्रिस, जापान, दक्षिण कोरिया, मलेसिया, सिंगापुर, युके, युक्रेनलगायत मुलुकमा छुर्पी निर्यात हुने गरेको छ । सबैभन्दा धेरै निर्यात अमेरिकामा भएको छ ।

४ महिनामा अमेरिकामा मात्रै १ अर्ब २ करोड २३ लाख ७१ हजार रुपैयाँको ५ लाख ५२ हजार ४८ किलो छुर्पी निर्यात भएको छ । क्यानडामा ७ करोड ७२ लाख ९७ हजार रुपैयाँको ३२ हजार ४ सय ५ किलो छुर्पी निर्यात भएको विभागले बताएको छ ।

पूर्वी नेपालमा उत्पादन हुने छुर्पीको ठूलो हिस्सा भारतीय बजार हुँदै विदेश निर्यात हुने गरेको छ ।