भारतको मुम्बईमा डुंगा दुर्घटना हुँदा १३ जनाको मृत्यु

काठमाडाैं । भारतको मुम्बईमा डुंगा दुर्घटना हुँदा १३ जनाको मृत्यु भएको छ । गेटवे अफ इण्डियाबाट एलिफेन्टा द्वीप जाँदै गरेको डुंगा दुर्घटना हुँदा १३ जनाको मृत्यु भएको हो ।

इण्डियन नेवी (नौसेना)को एक स्पिड बोटले ठक्कर दिएपछि दुर्घटना भएको बताइएको छ ।

मुख्यमन्त्री देवेन्द्र फडणविसले सञ्चारकर्मीसँग कुरा गर्दै यो घटनामा १३ जनाको मृत्यु भएको पुष्टि गरेका छन् । मृतकमा नौसेनाका तीन जवान पनि छन् । उद्धारकर्ताले १०१ जनाको उद्दार गरेका छन् ।

मृतकका परिवारलाई राज्य सरकारले ५–५लाख रुपैयाँ राहत दिने घोषणा गरेको छ ।

इण्डियन नेवीका अनुसार स्पिड बोट इन्जिन परीक्षणको क्रममा अनियन्त्रित भएर यात्रु सवार डुंगामा ठोक्किएको थियो ।