विराटनगरकाे बसपार्कमा खुकुरी प्रहार, एक जना पक्राउ

विराटनगर । विराटनगर बसपार्कमा खुकुरी प्रहार गरेकाे आराेपमा प्रहरीले एक जनालाई पक्राउ गरेको छ ।

विराटनगर महानगरपालिका – ११ मा रहेकाे बसपार्कमा मंगलबार राति करिब साढे १० बजे सामान्य विवादमा विराटनगर– ११ का रेगन कँडेलले विराटनगर -१२ का विजय कामतलाई खुकुरी प्रहार गरेका थिए ।

सामान्य विवादमा राति खुकुरी प्रहार भएको देखिएको जिल्ला प्रहरी कार्यालय मोरङका डीएसपी वेदप्रकाश जोशीले जानकारी दिए । कँडेलले खुकुरी प्रहार गर्दा कामतको बायाँ हातमा गहिरो चोट लागेको छ । 

प्रहरीले राति नै कँडेललाई पक्राउ गरेको थियो । उनीमाथि ज्यान मार्ने उद्योगमा मुद्दा दर्ता गरेर अनुसन्धान सुरु गरेको जोशीले बताए ।