लामिछाने पत्नी निकिताको गुनासो :‘मिडिया ट्रायल भयो’

काठमाडौं । राष्ट्रिय स्वतन्त्र पार्टीका सभापति रवि लामिछाने प्रहरी हिरासतमा छन् । सहकारी ठगी सम्बन्धि अनुसन्धान प्रतिवेदन प्रहरीले सरकारी वकिलकाे कार्यालयमा बुझाएकाे छ । सरकारी वकिलकाे कार्यालयले केही दिन भित्र मुद्दा दर्ता गर्नेछन् ।

लामिछानेकी पत्नी निकिता पौडेलले भने आफूहरुमाथि मिडिया ट्रायल भएको गुनासो गरेकी छन् । आफ्नो खाताबाट ठूलो रकमको कारोवार भएको समाचार प्रकाशित भएको गुनासो गर्दै उनले मिडिया ट्रायल भएको गुनासो गरेकी हुन् ।

सामाजिक सञ्जालमा स्टाटस लेख्दै पौडेलले ४ करोडमा किनेको घरको अहिलेसम्म किस्ता तिरिरहेको पनि बताएकी छन् ।

‘कुनै मिडियाले यति करोड, कुनैले उति करोड भनेर लेखेका छन् । मिडियाले धर्म नछोडेको भए बैंकिङ कारोवारको अंक सबैमा ठ्याक्कै एउटै हुनुपर्ने होइन र ?’ उनले लेखेकी छन् ।

आफूले सम्पूर्ण बैकिङ विवरण प्रहरीलाई बुझिसकेको भन्दै उनले संवेदनशील विषयमा मिडियामा संवेदनहीन विषय आएको उनको गुनासो छ ।