रवि लामिछानेमाथि तीन कसुरमा मुद्दा चलाउन प्रहरीकाे राय

काठमाडौं । लामाेसमयकाे अनुसन्धानपछि प्रहरीले राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्धकाे अनुसन्धान प्रतिवेदन सरकारी वकिलकाे कार्यालयलाई बुझाएको छ ।

गत कात्तिक २ गते पक्राउ परेका लामिछानेमाथिकाे अनुसन्धान प्रतिवेदन सोमबार प्रहरीले जिल्ला सरकारी वकिलको कार्यालयमा बुझाइएको हो ।

अनुसन्धान प्रतिवेदन बुझाएको प्रहरीले लामिछानेविरुद्ध सहकारी ठगी, संगठित अपराध र सम्पत्ति शुद्धिकरणको कसुरमा मुद्दा चलाउन राय दिएको छ ।

सरकारी वकिलको कार्यालयले जिल्ला अदालत कास्कीमा मुद्दा दायर गर्नेछ ।

कास्कीको सूर्यदर्शन सहकारी संस्थामा बचतकर्ताले राखेको रकम अनियमिततामा लामिछाने जोडिएको अनुसन्धान प्रतिवेदनमा छ ।

पोखराको सूर्यदर्शन सहकारीसँगै काठमाडौंको स्वर्णलक्ष्मी सहकारी, चितवनको सहारा चितवन र वीरगञ्जको सानो पाइला सहकारीमा बचतकर्ताको रकम अनियमिततामा प्रहरीले लामिछानेको बयान लिएको थियाे ।