झोराहाटमा मोटरसाइकल दुर्घटना हुँदा कटहरीका बाबुछाेराकाे मृत्यु

विराटनगर । मोरङको ग्रामथान गाउँपालिका–२ झोराहाटमा मोटरसाइकल दुर्घटना हुँदा बाबुछोराको मृत्यु भएको छ ।

आज बिहानको राति करिब १ बजे झोराहाट चौक स्थित नहरको पुलमा प्रदेश१–०४–००२प १९०१ नम्बरको मोटरसाइकल ठोक्किएर दुर्घटना भएको थियो ।

दुर्घटनामा परी कटहरी गाउँपालिका– १ का २२ वर्षीय आशिक मरिक र ४५ वर्षीय उमेश मरिकको मृत्यु भएको हो । प्रहरीका अनुसार उनीहरु बाबुछोरा हुन् ।

प्रहरीका अनुसार प्रदेश१–०४–००२प १९०१ नम्बरको मोटरसाइकल आशिकले चलाएका थिए ।

तीव्र गतिमा रहेको मोटरसाइकल घिनाघाट–विराटचोक सडक खण्डकाे झाेराहाटमा रहेकाे नहरकाे पुलमा ठोक्किएको थियो ।

दुर्घटनामा गम्भीर घाइते भएकालाई प्रहरीले विराट नर्सिङहोम पठाएको थियो । अस्पतालमा उपचारका क्रममा राति नै उनीहरुको मृत्यु भएको हो ।