विद्राेहीले कब्जा गरे सिरियाकाे राजधानी, राष्ट्रपति असदले देश छाडेको दाबी

काठमाडौं । विद्रोही समूह हयात तहरीर अल–शाम (एचटीएएस)ले राजधानी दमास्कससहितका अधिंकाश सहर कब्जा गरेका छन् । विद्रोहीले सहरहरू कब्जा गरेपछि सिरियाका राष्ट्रपति बसर अल असदले देश छाडेकाे दाबी गरिएको  छ ।

सिरियामा विद्रोहीले राजधानी दमास्कससहितका धेरै सहरहरुलाई आफ्नो नियन्त्रणमा आइरहेको जनाएको छ ।

सिरियाली सरकारको नियन्त्रणमा रहेका सहर र सैन्य अड्डाहरु विद्रोहीको कब्जामा पुगेका छन् ।

अब सिरिया स्वतन्त्र भएको दाबी विद्रोही पक्षको छ । विद्रोहीले यो दाबी गरिरहँदा सिरियाका राष्ट्रपति बसर अल असदको विमान आकाशमा उडेको देखिएको थियो ।

उनले परिवारसहित देश छाडेर भागेको विभिन्न सञ्चार माध्यमले जनाएका छन् ।

राष्ट्रपति बसरले शनिबार साँझ नै देश छाडेको दाबी गरिए पनि त्यसको आधिकारिक पुष्टि हुन बाँकी छ । उनी रुसको शरणमा पुगेको विभिन्न सञ्चार माध्यमले जनाएका छन् ।

विद्रोहीहरूले दमास्कसबाट केही दूरीमा रहेको राष्ट्रपति असदका पिता तथा पूर्वशासक हाफेज अल असदको प्रतिमा भत्काएका थिए । यसैबीच, अमेरिकाका नवनिर्वाचित राष्ट्रपति डोनाल्ड ट्रम्पले सिरियाको विषयमा ट्वीट गर्दै राष्ट्रपति जो बाइडेनलाई सिरियाको विषयमा कदम नचाल्न भनेका छन् ।

ट्रम्पले यो अमेरिकाको लडाइँ नभएको र सिरियाको आन्तरिक विषय भएको उल्लेख गरेका छन् । एजेन्सीकाे सहयाेगमा