नक्कली सुन देखाएर पूर्वी नेपालमा ठगी गर्ने गिरोह पक्राउ

विराटनगर । नक्कली सुनका गरगहना देखाएर सर्वसाधारणलाई ठगी गरेको अरोपमा प्रहरीले २ जना भारतीयसहित ६ जनालाई पक्राउ गरेको छ । ६ जनाको गिरोहले पूर्वी नेपालका विभिन्न स्थानमा ठगी गरेको थियो ।

मोरङ प्रहरीका प्रवक्ता डीएसपी वेदप्रकाश जोशीका अनुसार झापाको कमल गाउँपालिका–१ तोपगाछीका ५२ वर्षीय अशोक तामाङ, कनकाई नगरपालिका–९ घैलाडुब्बाका ५९ वर्षीय धकलबहादुर थिङ, अर्जुनधारा नगरपालिका–११ का ५४ वर्षीय प्रवीन तामाङ र हल्दिबारी गाउँपालिका–३ का ६६ वर्षीय रामबहादुर कन्दङवा, भारतको दार्जिलिङका ५१ वर्षीय नारायण गुरुङ र ३४ वर्षीय सञ्जय शर्मा पक्राउ परेका हुन् ।

गत २७ कात्तिकमा विराट शिक्षण अस्पतालबाट दाजुभाइको नाता लगाएर साेही समूहका सदस्यले संखुवासभाको पाँचखपन नगरपालिका–५ का कृष्णबहादुर तामाङको साथमा रहेको १ लाख १० हजार रूपैयाँ चोरेर लगेको थियो । चोरी गर्ने व्यक्तिको खोजी गर्ने क्रममा गिरोह पत्ता लागेको थियो ।

प्रहरीका अनुसार विराट शिक्षण अस्पतालबाट कृष्णबहादुरको पैसा चोर्ने व्यक्ति अशोक तामाङ हुन् । उनलाई पक्राउ गरेपछि प्रहरी गिरोहसम्म पुगेको थियो । यो गिरोहले मोरङ, झापा र सुनसरीमा नक्कली सुन देखाएर ठगी गरेको प्रहरीले बताएको छ । कोशी प्रदेश प्रहरी कार्यालय विराटनगर र जिल्ला प्रहरी कार्यालय सुनसरीको टोलीले गिरोहलाई इटहरीका विभिन्न स्थानबाट पक्राउ गरेको थियो ।

हटिया, अस्पताल, मेला, पर्व र भिडभाड बढी हुने ठाउँमा गएर गरगहना लगाएका सोझा र वृद्ध अवस्थाका मानिसहरुलाई नक्कली सुन देखाएर ठगी गर्ने गरेको देखिएको मोरङ प्रहरी प्रमुख नारायण चिमरीयाले बताए । यो समूहले नक्कली सुनको बिस्कुट देखाएर सुनसरीमा ५, मोरङमा ४ र झापामा १ जनालाई ठगी गरेको भेटिएको छ । अन्य व्यक्तिलाई पनि ठगी गरेको हुनसक्ने प्रहरीले बताएको छ ।

प्रहरीले पक्राउ परेको समूहको साथबाट तिलहरी, हार, मंगलशूत्र, टिल, चन्द्रमा, कानमा लगाउने रिङ, बेरुवा, लकेट, सिक्री, झुम्का, टप, ब्रासलेट, औंठी, चाँदीको पाउजू, जिमाला, कालो पोतेलगायत सामग्री बरामद गरेको छ । २ लाख ७२ हजार ४ सय ३० नेपाली र २ हजार ६ सय ३० भारती रूपैयाँसमेत बरामद भएको छ ।