नमोनारायण माझीलाई कांग्रेसले पत्याएन, माओवादीबाट पालिका अध्यक्ष जिते

विराटनगर । विं.स. २०७४ सालको स्थानीय तह निर्वाचनमा तत्कालिन फोरम लोकतान्त्रिकबाट ग्रामथान गाउँपालिका– १ को वडा अध्यक्ष जितेका नमोनारायण माझी २०७९ सालको स्थानीय तह निर्वाचनमा पालिका अध्यक्षको आकांक्षी थिए । उनी वडा अध्यक्षको टिकट पाए पनि उठ्न तयार थिए ।

फोरम लोकतान्त्रिक कांग्रेसमा विलय भएका कारण २०७९ को निर्वाचनमा कांग्रेसबाट पालिका अध्यक्ष दाबी गरे । तर पार्टीले पत्याएन, वडामा पनि निकट नदिएपछि स्वतन्त्र उम्मेदवारी दिए । वडा अध्यक्षमा सुरेशकुमार माझी विजयी हुँदा स्वतन्त्र उम्मेदवारी दिएका नमोनारायण तेस्रो भए ।

त्यसपछि उनी कांग्रेसमा फर्किएनन् । स्थानीय तहको उपनिर्वाचनअघि गत भदौ २९ गते उनलाई नेकपा माओवादी केन्द्रका नेता अमनलाल मोदीले पार्टी अध्यक्ष पुष्पकमल दाहाल प्रचण्डको हातबाट टीका लगाउँदै पार्टी प्रवेश गराए । उनीसहित अन्य पार्टीका कार्यकर्तालाई प्रवेश गराउन ‘प्रचण्ड’ ग्रामथानको नेता चोक आएका थिए ।

कांग्रेसले नपत्याएका माझीले उपनिर्वाचनमा नेकपा माओवादी केन्द्रबाट ग्रामथान गाउँपालिकाको अध्यक्ष जितेका छन् । ६ हजार ९६९ मत ल्याएर उनी बिजयी भएका हुन् । उनका निकटतम प्रतिस्पर्धी नेपाली कांग्रेसका उम्मेदवार बलराम सरदारले ५ हजार ३३३ मत ल्याए । एमाले उम्मेदवार तुलसीराम विश्वासले ४ हार १५९ मत प्राप्त गरे ।

ग्रामथानको अध्यक्ष जितेका माझी आँटिला उम्मेदवार मध्ये पर्थे । स्थानीय जनताको सरोकारका विषयमा बोलिरन्थे । नागरिक सरोकारको विषय उठाउँदा अभद्र व्यवहार मुद्दा पनि खेपे ।

ग्रामथान–१ को रामजानकी मन्दिरका लागि बजेट माग गर्दै २०८० चैत ११ गते गाउँपालिकाको कार्यालयमा प्रदर्शन गरे । तोडफोडको प्रयास पनि भयो । कार्यपालिका बैठकको समयमा हुलहुज्जत गरेको भन्दै गाउँपालिकाको तर्फबाट जाहेरी परेपछि प्रहरीले उनलाई पक्राउ गरेर अभद्र व्यवहार मुद्दा चलायो । अभद्र व्यवहार मुद्दामा नमोनारायण माझीसँगै विष्णुप्रसाद माझी, राजनारायण भगत, सञ्जितादेवी भगत, तिलकराम माझी, खड्गबहादुर मगर, बिन्दाकुमारी सुतिहार, कल्पना मगर र धीरेन्द्रकुमार भगतलाई २०८१ भदौ १७ गते जरिवानाको फैसला भएको थियो ।

यो मुद्दाका कारण पनि उनको पक्षमा माहोल बनेको थियो । पालिका नेतृत्वले काम नगरेको र बजेट माग गर्दा आफूलाई अभद्र व्यवहार मुद्दा लगाएको भन्दै भोट मागेका थिए ।

नेकपा माओवादी केन्द्रका नेता कुशल लिम्बुका अनुसार माझी २०५४ सालको स्थानीय निकायको निर्वाचनमा तत्कालिन लखनतरी गाउँ विकास समितिको अध्यक्ष जितेका थिए । कांग्रेसबाट अध्यक्ष निर्वाचित हुँदा उनले एमाले उम्मेदवारलाई २ मतले पराजित गरेका थिए ।

त्यसपछि लामो समय स्थानीय तह जनप्रतिनिधि बिहीन बन्यो । यो बिचमा उनी विदेश पनि गए । माझी माओवादीकै कारण विदेशिएका थिए । माओवादी युद्धका बेला उनी माओवादी टार्गेटमा पर्ने भन्दै विदेशिएका थिए । २०६० सालमा मलेसिया गएका उनी २०६७ सालमा फर्किए । त्यसपछि दुबई पनि गएका थिए । विदेशबाट फर्किएपछि २०७४ को निर्वाचनमा उनी वडा अध्यक्ष विजयी भए । माझीले २०४५ सालदेखि नेपाल विद्यार्थी संघबाट राजनीति सुरु गरेका थिए ।

ग्रामथानमा माओवादीबाट माझी उम्मेदवार थिए । तर बाहिर चर्चा भने अमनलाल मोदी भर्सेस कांग्रेस एमालेबीच प्रतिस्पर्धाको चर्चा थियो । चुनावी अभियानका क्रममा फरक पार्टीबाट जितेका कारण आफूले केन्द्रबाट ल्याएको बजेट पालिकाले खर्च नगरी फिर्ता पठाउने गरेको उनको गुनासो थियो । ‘ म केन्द्रमा थिए, माथिबाट बजेट ल्याउँदा यहाँ फरक पार्टी भएकै कारण पालिकाले खर्च गर्न मानेन,’ हरेक चुनावी अभियानमा उनी भन्थे,‘हाम्रै पार्टीको मान्छे भए भने बजेट ल्याउन र विकास निर्माणमा खर्च गर्न सजिलो हुन्छ ।’

माझीलाई पार्टी प्रवेश गराउनेदेखि अध्यक्ष निर्वाचित गराउने अभियानमा मोदी सँगै विजय विश्वास, जीवन आचार्यलगायत नेताहरु सक्रिय थिए ।

नेकपा माओवादी केन्द्रका केन्द्रीय सदस्य जीवन आचार्य युवाको टिमलाई जनताले पत्याएको बताउँछन् । ‘ युवाहरुको टिमलाई जनताले पत्याएका छन्, उनले भने,‘ युवाको टिमले ग्रामथानमा काम पनि राम्रो गरिरहेको छ ।’