ग्रामथानकाे अध्यक्षमा माओवादी उम्मेदवार १४ सय मतले अगाडि, २३ सय मत गणना हुन बाँकी

विराटनगर । मोरङको ग्रामथान गाउँपालिकाको अध्यक्षमा नेकपा माओवादी केन्द्रका उम्मेदवार जित नजिक पुगेका छन् ।

पछिल्लो मत परिणाम अनुसार माओवादी केन्द्रका उम्मेदवार नमोनारायण माझीले ६ हजार २८० मत पाएका छन् । उनका निकटमत प्रतिद्वन्धी नेपाली कांग्रेसका बलराम सरदारले ४ हजार ७९१ मत पाएका छन् । नेकपा एमाले उम्मेदवार तुलसीराम विश्वसाले ३ हजार २६६ मत पाएका छन् ।

ग्रामथानमा नमोनारायण माझीले दोस्रो स्थानमा रहेका कांग्रेस उम्मेदवारसँग १ हजार ४ सय ८५ मतको अग्रता बनाएका छन् । नेकपा माओवादी केन्द्रका नेता कुलश लिम्बुले मतगणना नसकिदै माझीको जित निश्चित भएपछि मतगणना स्थल आसपास कार्यकर्ताले खुसियाली मनाइरहेका छन् ।

ग्रामथानमा अब २ हजार ३ सय ८३ मत गणना हुन बाँकी छ । आइतबार भएको उपनिर्वाचनमा ग्रामथानमा १८ हजार ५७७ मत खसेको थियो । सोमबार बिहान साढे ७ बजेसम्म १६ हजार १९४ मत गणना भएको छ ।