स्थानीय तह उपनिर्वाचन : काेशीका ८ स्थानमा कहाँ कति खस्याे मत ?

विराटनगर । स्थानीय तह उपनिर्वाचनकाे मतदान सकिएकाे छ । मतदानमा प्रक्रियामा मतदाताकाे उत्साहपूर्ण सहभागिता देखिएकाे छ । देशभर करिब ६२ प्रतिशत मतदान भएकाे छ ।

आज काेशी प्रदेशकाे ८ स्थानमा उपनिर्वाचन भएकाे थियाे ।

मोरङको ग्रामथान गाउँपालिकाको अध्यक्ष, ताप्लेजुङको सिरिजंघा गाउँपालिका ३, झापाको कनकाई नगरपालिका ६, तेहृथुमको लालीगुराँस नगरपालिका ८, सुनसरीको गढी गाउँपालिका ६, ओखलढुङ्गाको मोलुङ गाउँपालिका ५, उदयपुरको त्रियुगा नगरपालिका १२, बेलका नगरपालिका ९ काे वडा अध्यक्षका लागि मतदान भएको हाे ।

उपनिर्वाचनमा ग्रामथान गाउँपालिकामा १८ हजार ५७७ अर्थात ७१‍.३ प्रतिशत, ताप्लेजुङकाे सिरिजंघा– ३ मा ८९१ अर्थात ५८.३१ प्रतिशत, झापाकाे कनकाइ नगरपालिका ६ मा १ हजार ५१३ अर्थात ७३‍‍.५१ प्रतिशत मत खसेकाे छ ।

त्यस्तै तेह्रथुमकाे लालिगुरास – ८ मा ९२३ अर्थात ६२‍.३२ प्रतिशत, सुनसरीकाे गढी गाउँपालिका ६ मा २ हजार ६४५ अर्थात ७३.२ प्रतिशत, ओखलढुङ्गाको मोलुङ गाउँपालिका ५ मा ७६८ अर्थात ५७.९६ प्रतिशत, उदयपुरकाे त्रियुगा नगरपालिका १२ मा २ हजार ७२७ अर्थात ६५‍.६८ प्रतिशत र उदयपुरकै बेलका नगरपालिका ९ मा १ हजार ८८५ मत अर्थात ६० प्रतिशत मत खसेकाे प्रदेश निर्वाचन कार्यालय विराटनगरका प्रमुख चाेलाराज दंगालले जानकारी दिए ।

कोशी प्रदेशमा एक गाउँपालिका अध्यक्ष र ७ वडाध्यक्ष पदका आज मतदान भएको थियो । पालिका अध्यक्षका लागि १६ जना र सात वडाको अध्यक्षका लागि ५५ जना प्रतिष्पर्धामा छन् ।

उपनिर्वाचन भएकाे पालिकामा ४३ हजार ११ जना मतदाता थिए । प्रदेशकाे उपनिर्वाचन भएकाे ८ वटै क्षेत्रमा मतपेटिका संकलन जारी छ । मतपेटिका संकलनपछि आजबाटै मतगणना सुरु हुने उनले बताए ।