प्रधानमन्त्रीको चीन भ्रमण : राष्ट्रपति र प्रधानमन्त्रीसँग भेटवार्ता गर्ने, विश्वविद्यालय पनि जाने

काठमाडौं । प्रधानमन्त्री केपी शर्मा ओलीको चीन भ्रमणको तालिका सार्वजनिक भएको छ । परराष्ट्र मन्त्रालयले आज भ्रमण तालिका सार्वजनिक गरेको हो । तालिका अनुसार ८७ जनाको टोलीसहित प्रधानमन्त्री ओली मंसिर १७ गते बेइजिङ प्रस्थान गर्नेछन् ।

प्रधानमन्त्री ओली मंसिर १७ गतेदेखि २० गतेसम्म (डिसेम्बर २–५ तारिक) चीनको औपचारिक भ्रमण गर्नेछन् । भ्रमण टोलीमा उनकी पत्नी राधिका शाक्य, प्रमुख सल्लाहकार विष्णु प्रसाद रिमाल, आर्थिक तथा विकास सल्लाहकार डा। युवराज खतिवडा, सांसदहरू, उच्च सरकारी अधिकारीहरू, निजी क्षेत्रका प्रतिनिधिहरू, सञ्चारकर्मीसहित ८७ जना रहने छन् ।

१७ गते बेइजिङ प्रस्थान गर्ने ओलीले १८ गते राष्ट्रपति सी जिनपिङ र प्रधानमन्त्री ली छ्याङसँग द्विपक्षीय भेटवार्ता गर्ने कार्यक्रम छ ।

उनले चिनियाँ जनकांग्रेसका स्थायी समिति अध्यक्ष चाओ लेजीसँग पनि भेटघाट गर्ने कार्यसूची छ ।

भ्रमणका क्रममा प्रधानमन्त्री ओलीले पेकिङ विश्वविद्यालयमा मन्तव्यसमेत दिने छन् । उनले नेपाल–चीन व्यापार मञ्चलाई पनि सम्बोधन गर्ने कार्यक्रम छ । यो मञ्च नेपालस्थित चिनियाँ दूतावास, चीनको अन्तर्राष्ट्रिय व्यापार प्रवर्द्धन परिषद र नेपाल उद्योग वाणिज्य महासंघको सहआयोजनामा आयोजना हुनेछ ।

प्रधानमन्त्री ओली नेतृत्वको भ्रमण टोली मंसिर २० अर्थात् डिसेम्बर ५ मा नेपाल फर्कने छ ।