कोशीमा उपचार सहयोगका लागि ३२४३ जनाको निवेदन, मन्त्रालयलाई बजेट पुगेन

विराटनगर । कोशी प्रदेशको स्वास्थ्य मन्त्रालयमा कडा रोगको उपचार सहयोगका लागि तीन हजार बढीले निवेदन दिएका छन् । तर बजेट अभावका कारण मन्त्रालयले सहयोग वितरण गर्न सकेको छैन ।

प्रदेश स्वास्थ्य मन्त्रालयका अनुसार ३ हजार २४३ जनाले उपचार सहयोग माग गर्दै निवेदन परेको छ ।

कडा खालको रोगीको उपचारका लागि सरकारले गत वर्ष ५० हजारका दरले सहयोग रकम उपलब्ध गराएको थियो । गत वर्ष सरकारले पाँच करोड रुपैयाँ वितरण गरेको थियो ।

चालु आर्थिक वर्षका लागि पनि पाँच करोड रुपैयाँ बजेट विनियोजन भएको छ । तर उपचार सहयोगका लागि निवेदन दिनेको सङ्ख्या ३ हजार २४३ भएका कारण सरकारले रकम वितरण नगरेको हो ।

कोशी प्रदेशका स्वास्थ्य मन्त्री भूपेन्द्र राईले कडा खालका रोगीका लागि सहयोग रकम हस्तान्तरणका लागि थप बजेट माग गरिएको बताए । उनका अनुसार निवेदन दिएकाहरुलाई ५० हजारले सहयोग रकम वितरण गर्नका लागि १४ करोड हाराहारी बजेट चाहिन्छ । ५ करोड मात्रै बजेट विनियोजन भएका कारण थप ९ करोड बजेट सुनिश्चित गरेर उपचार सहयोग वितरण गर्ने उनले बताए । कोशी प्रदेश सरकारले क्यान्सर, मृगौला र मुटु रोगलगायत कडा रोगीलाई ५० हजार रुपैयाँका दरले गत वर्ष सहयोग वितरण गरेको थियो ।

स्वास्थ्य मन्त्रालयमा ३ हजार २४३ निवेदन मध्ये मन्त्रालयले ५१५ जनालाई सहयोग वितरण गर्ने निर्णय गरिसकेको छ । २ हजार ७३४ वटा निवेदनमाथि निर्णय हुन बाँकी छ ।