एनपिएलका लागि विराटनगरको तयारी पूरा

विराटनगर । नेपाल प्रिमियर लिग एनपिएल क्रिकेट प्रतियोगिताका लागि विराटनगर किंग्सले आफ्नो तयारी पूरा गरेको जनाएको छ । मंसिर १५ देखि एनपिएल सुरु हुँदैछ । प्रतियोगिताको उद्घाटन खेल विराटनगर र जनकपुर बोल्ड्सबीच हुनेछ ।

मंगलबार पत्रकार सम्मेलन गर्दै विराटनगर किंग्सका मालिक तथा पूर्व क्रिकेट खेलाडी पारस लुनियाले तयारी पूरा भएको बताए । उनले प्रतियोगिताका लागि कोच र मार्की खेलाडी सन्दीप लामिछानेको सल्लाहमा खेलाडी छानेको जानकारी दिए ।

उनले एनपीएलमा कोशी प्रदेशको नाम राख्ने गरी खेल खेल्ने र लिगले खेलाडी उत्पादनमा निकै सहयोग पुर्‍याउने बताए ।

एनपीएल एक किसिमको व्यापार भएको र यसबाट मुलुकमात्र होइन, क्रिकेट एसोसिएसन र क्रिकेट खेलाडीहरूलाई फाइदा पुग्ने बताए ।

विराटनगर किंग्सका खेलाडीले विराटनगर– ६ स्थित मेरिलेबोन ज्वाला क्रिकेट मैदानमा प्रशिक्षण गरेका थिए । टोली प्रतिस्पर्धाका लागि बुधबार राजधानी काठमाडौं जाँदैछ ।

५ जना विदेशी खेलाडीसहित ट्यालेण्ट हण्टबाट छानिएका ३ जना खेलाडीहरूसमेत समावेश गरेर विराटनगर किंग्सको क्रिकेट टिम बनाइएको प्रशिक्षक दीपेन्द्र चौधरीले जानकारी दिए ।