एनपीएलको ट्रफीमा सगरमाथा आधार शिविरको ढुंगा

काठमाडौं । प्रधानमन्त्री केपी शर्मा ओलीको उपस्थीतिमा नेपाल प्रिमियर लिग(एनपीएल) को ट्रफी सार्वजनिक भएको छ ।

लिगमा सहभागी ८ टिमका मार्की खेलाडीले धरहरा परिसरबाट एनपीएलको ट्रफी अनावरण गरेका हुन् ।

ट्रफीमा सगरमाथाको आधार शिविर कालापत्थरबाट ल्याइएको ढुंगा समावेश छ ।

विश्वलाई हिमाल संरक्षण गर्ने सन्देश दिनका लागि सगरमाथाको आधार शिविर कालापत्थरको ढुंगा राखिएको नेपाल क्रिकेट संघ (क्यान)का सचिव पारस खड्काले जानकारी दिए ।

ट्रफीमा राख्नका लागि आरोहीद्वय निमा शेर्पा र मिङ्मा शेर्पाले ढुंगा ल्याएका थिए ।

अनावरण कार्यक्रमलाई सम्बोधन गर्दै प्रधानमन्त्री ओलीले एनपीएलले नेपाली क्रिकेटको विकास गर्ने बताए । सरकारले खेलकुद क्षेत्रलाई जति प्रोत्साहन गर्नुपर्ने हो, त्यति गर्न नसकेको पनि उनले बताए ।