जीवन विकासकाे १४ प्रतिशत बोनस शेयर घाेषणा

विराटनगर । जीवन विकास लघुवित्त वित्तीय संस्था लिमिटेडले शेयरधनीलाई १४ प्रतिशत बोनस शेयर वितरण गर्ने घोषणा गरेको छ ।

गत आर्थिक वर्षको मुनाफाबाट लघुवित्तले शेयरधनीहरुलाई १४ प्रतिशत बोनस शेयर र कर प्रयोजनका लागि ०.७३६८ प्रतिशत नगद लाभांश वितरण गर्ने घोषणा गरेको हो ।

मंसिर ७ गते बसेको लघुवित्तको सञ्चालक समितिको बैठकले हाल कायम चुक्ता पूँजीको १४.७३६८ प्रतिशतका दरले (बाेनस र कर प्रयाेजनका लागि नगद) लाभांश वितरण गर्ने निर्णय गरेको हो ।

आगामी वार्षिक साधारण सभाले पारित गरेपश्चात याे लाभांश शेयरधनीले प्राप्त गर्नेछन् ।

मोरङकाे कटहरी गाउँपालिका २ मा केन्द्रीय कार्यालय रहेको जीवन विकास लघुवित्त वित्तीय संस्थाले आर्थिक वर्ष २०८०/०८१ को चौथो त्रैमाससम्म ५८ करोड २२ लाख मुनाफा आर्जन गरेको थियो ।

कोशी, मधेश र बागमती प्रदेशका २४ जिल्लामा १६० वटा शाखा कार्यालय मार्फत जीवन विकासले घरदैलाेमा पुगेर लघुवित्त सेवा प्रवाह गरिररहेकाे छ ।

नेपालकाे ठूलाे लघुवित्त मध्येकाे एक जीवन विकासमा ३ लाख ३९ हजार सदस्य र ९९३ जना कर्मचारी छन् ।

जीवन विकासले चालु आर्थिक वर्षको पहिलो त्रैमासमा ९ करोड ९३ लाख ८५ हजार रुपैयाँ खुद मुनाफा आर्जन गरेको थियो ।