कोशी प्रदेशका मुख्यमन्त्रीको निवास अगाडि शंकास्पद वस्तु

विराटनगर । कोशी प्रदेशका मुख्यमन्त्री हिक्मतकुमार कार्कीको झापा स्थित निवास अगाडि शंकास्पद वस्तु फेला परेको छ ।

शनिबार बिहान गौरादह नगरपालिका– ३ डिपु चोकमा रहेको कार्कीको घर अगाडि शंकास्पद बस्तु फेला परेको हो ।

उनको घर अगाडि प्लास्टीकले बेरेर दुई वटा बोतलमा शंकास्पद वस्तु फेला परेकाे प्रहरीले बताएकाे छ ।

विराटनगरबाट मुख्यमन्त्री कार्की आज बिहान घर पुगेका थिए । बिहान घरमा आमालाई भेटेर उनी बाह्रदशी गाउँपालिकामा आयोजित कार्यक्रममा सहभागी हुन गएको मुख्यमन्त्रीका प्रेस सल्लाहकार बिक्रम लुइटेलले बताए ।

जिल्ला प्रहरी कार्यालय झापाका प्रवक्ता कृष्णकुमार चन्दका अनुसार शंकास्पद वस्तु भेटिएको जानकारी आएपछि प्रहरी टोली पुगेर डिस्पोजको तयारी गरिरहेको छ ।