पक्राउ परे पूर्वमन्त्री दिपक मनाङे

काठमाडौं । गण्डकी प्रदेशका  सांसद तथा पूर्वमन्त्री दीपक मनाङे पक्राउ परेका छन् ।

ज्यान मार्ने उद्योगमा सर्वाेच्च अदालतबाट दोषी ठहर भएका मनाङे आज काठमाडौंको सानोभर्‍याङबाट पक्राउ परेका हुन् ।

कम्फर्ट हाउजिङमा लुकेर बसेको अवस्थामा पक्राउ गरिएको केन्द्रीय अनुसन्धान ब्युरो (सीआईबी)का प्रमुख एआईजी दीपक थापाले जानकारी दिए । पक्राउ परेका मनाङेलाई फैसला कार्यान्वयनका लागि आजै अदालत उपस्थित गराइने उनले बताए ।

गण्डकी प्रदेश सभा सदस्य दीपक मनाङेलाई सर्वोच्च अदालतले कात्तिक २० गते ज्यान मार्ने उद्योगमा दोषी ठहर गर्दै पाँच वर्ष कैद सुनाएको थियो ।

तत्कालीन पुनरावेदन अदालत पाटनले मनाङेलाई २०६९ सालमा ५ वर्ष कैद सजाय सुनाएको थियो । सर्वोच्चले पनि दोषी ठहर गरेपछि मनाङे विरुद्ध पक्राउ पुर्जी जारी भएको थियो ।

दीपक मनाङेको समूहले २०६१ सालमा अर्का डन मिलन चक्रे भनिने मिलन गुरुङलाई तरबार हानेको थियो ।