एमाले सांसद अधिकारी काठमाडाैं प्रहरीकाे हिरासतमा

विराटनगर । कोशी प्रदेश सांसद तथा पूर्वमन्त्री लिलाबल्लभ अधिकारीलाई प्रहरीले काठमाडौं पुर्याएको छ । आइतबार विराटनगर स्थित डेराबाट पक्राउ परेका अधिकारीलाई हवाइजहाजमार्फत काठमाडौं पुर्याएको हो ।

त्रिभुवन विमानस्थलबाट उनलाई जिल्ला प्रहरी परिसर काठमाडौंमा लगिएको परिसरका प्रवक्ता एसपी नवराज अधिकारीले जानकारी दिए ।

कोशी प्रदेशका तत्कालिन आन्तरिक मामिलामन्त्री अधिकारीलाई मानव तस्करीको आरोप छ । मन्त्रिपरिषदबाट भ्रमण स्वीकृत नगराई जापान भ्रमणमा गएका अधिकारीसहित चार जना विमानस्थलबाट फर्काइएका थिए । भ्रमण टोलीमा रहेको भनिएका तीन जनालाई प्रहरीले नियन्त्रणमा लिएको छ ।

मानव तस्करको योजना अनुसार मन्त्री जापान पुगेको भन्दै विरोध भएपछि बुधबार उनले मन्त्रीबाट राजीनामा दिएका थिए ।

शनिबार एमालेको कोशी प्रदेश कमिटीले राष्ट्रिय प्रतिनिधि परिषद सदस्य तथा पार्टीको संगठित सदस्यबाट निलम्बन गरेको थियो । शुक्रबार अधिकारीले पार्टीमा जिम्मेवारीबाट निलम्बन गर्न निवेदन दिएका थिए ।

अधिकारी त्रिभुवन विमानस्थलबाट एक्लै हिँडेका थिए । उनको दाबी अनुसार हङकङको ट्रान्जिटका बेला भ्रमण दलका सदस्य भन्दै खोटाङको ऐसेलुखर्क गाउँपालिका–२ का ३६ वर्षीय दावा शेर्पा, खोटाङकै कोपिलासगढी गाउँपालिका–४ का ४१ वर्षीय जनक राई र रसुवाको कालिका गाउँपालिका– ५ का २२ वर्षीय कञ्चन देवकोटा भ्रमण दलको सदस्य भन्दै आएका थिए ।

टोकियो विमानस्थलमा तीन जनाको कागजात शंकास्पद भेटिएपछि नेपाल फर्काइएका थिए । अधिकारीको भ्रमण दलमा समावेश भएको भनिएका तीन जना मध्ये दुई जनासँग कोशी प्रदेशको आन्तरिक मामिला तथा कानुन मन्त्रालय र एक जनासँग ऐसेलुखर्क गाउँपालिकाको वडा सदस्यको नक्कली परिचय पत्र फेला परेको थियो ।

तीन जनाको बयानका आधारमा नुवाकोटका २२ वर्षीय जुगल रिजाल, दोलखाका ३० वर्षीय वीरबहादुर सुनुवार र धादिङको त्रिपुरा सुन्दरी गाउँपालिकाका ३४ वर्षीय महेश पाण्डे पनि पक्राउ परेका छन् ।