कोशीका पूर्वमन्त्री अधिकारी प्रहरी नियन्त्रणमा

विराटनगर । कोशी प्रदेशका पूर्वमन्त्री तथा नेकपा एमाले सांसद लिलाबल्लभ अधिकारीलाई प्रहरीले नियन्त्रणमा लिएकाे छ । उनलाई विराटनगरस्थित निवासबाटै नियन्त्रणमा लिएकाे हाे ।

जिल्ला प्रहरी परिसर काठमाडौंले  अनुरोध गरेपछि जिल्ला प्रहरी कार्यालय माेरङले  उनलाई नियन्त्रणमा लिएकाे हाे । उनलाई आजै काठमाडाैं लगिदैछ ।

कोशी प्रदेशका डिआईजी चन्द्रकुबेर खापुङले  अधिकारीलाई काठमाडौं पठाउन लागिएको बताए । प्रहरीले नै काठमाडाैं लैजाने उनले बताए ।

कोशी प्रदेशका तत्कालिन आन्तरिक मामिलामन्त्री अधिकारीमाथि मानव तस्करीको गम्भीर आरोप छ ।

मन्त्रिपरिषदबाट भ्रमण स्वीकृत नगराई उनी जापान गएका थिए । काठमाडाैंबाट एक्लै गएका अधिकारीकाे भ्रमण टाेलीमा हङकङबाट तीन जना मिसिएका थिए । तर जापानको अध्यागमनले अधिकारीसहित पाँच जनालाई नेपाल फर्काइदिएको थियो । अधिकारीसँगै जापान गएका तीन जनालाई प्रहरीले पक्राउ गरेकाे थियाे ।

मानव तस्करको योजना अनुसार मन्त्री जापान पुगेको भन्दै विरोध भएपछि उनले बुधबार मन्त्री पदबाट राजीनामा दिएका थिए ।

उनलाई शनिबार एमालेको कोशी प्रदेश कमिटीले राष्ट्रिय प्रतिनिधि परिषद सदस्य तथा पार्टीको संगठित सदस्यबाट निलम्बन गरेको थियो ।