२५ वर्षयताका विद्यार्थीले प्लस २ काे मौका परीक्षा दिन पाउने

काठमाडौं । २५ वर्षयता भर्ना भएर पनि पढाइ पूरा नगरेका कक्षा ११ र १२ का विद्यार्थीले मौका परीक्षण दिन पाउने भएका छन् ।

प्लस–टु पूरा नगरेका २०५६ सालयताका विद्यार्थीले परीक्षा दिन पाउने भएका हुन् । राष्ट्रिय परीक्षा बोर्डका अनुसार मौका परीक्षामा सहभागी हुन इच्छुकले २०८१ मंसिर २७ गतेसम्ममा सम्बन्धित विद्यालयमार्फत परीक्षा फाराम भर्नुपर्ने छ ।

कुनै विषयमा अनुत्तीर्ण भएका, परीक्षामा अनुपस्थित भएका वा अक्षरांकन पद्दतिमा पुरानो ग्रेडिङ प्रणालीअनुसार डी र ई ग्रेड प्राप्त गरेकाहरुले मौका परीक्षा दिन पाउनेछन् । जतिसुकै विषयमा फेल भए पनि विद्यार्थीले मौका परीक्षा दिन पाउँछन् । प्रयोगात्मक विषय मात्र बाँकी रहेका विद्यार्थीले पनि मौका परीक्षा दिन पाउने छन् ।

कक्षा १२ कालागि रजिष्ट्रेसन नम्बरको सुरुका दुई अंक ५६ वा सोभन्दा बढी र ७७ वा सोभन्दा कम भएकाले मौका परीक्षाको फारम भर्न पाउँछन् । कक्षा ११ का लागि रजिष्ट्रेसन नम्बरको सुरुका दुई अंक ५६ वा सोभन्दा बढी र ७६ वा सोभन्दा कम भएकाहरुले अन्तिम एक पटकका लागि मौका परीक्षा दिन पाउने छन् ।

बोर्डका अनुसार यस्ता विद्यार्थीहरुको संख्या करिब १४ लाख रहेको अनुमान छ । आवेदन फारम प्राप्त भइसकेपछि मौका परीक्षाको तालिका सार्वजनिक गर्ने राष्ट्रिय परीक्षा बोर्डको तयारी छ । पुराना विद्यार्थीहरुको परीक्षा पुरानै पाठ्यक्रम अनुसार हुने बोर्डले जनाएको छ ।