उपनिर्वाचन : ग्रामथामका लागि ठूला दलले टुङ्गो लगाए उम्मेदवार

विराटनगर । मोरङको ग्रामथान गाउँपालिकाको अध्यक्षका लागि ठूला तीन दलले उम्मेदवारको टुङ्गो लगाएका छन् । आगामी मंसिर १६ गते हुने स्थानीय तहको उपनिर्वाचन हुँदैछ ।

सत्तारुढ नेकपा (९एमाले)ले तुलसीराम विश्वासलाई उम्मेदवार बनाउने निर्णय गरेको छ । उनी पार्टीको ग्रामथान गाउँपालिका उपाध्यक्ष हुन् । एमालेको शनिबार बसेको सचिवालय बैठकले विश्वासलाई अध्यक्षको उम्मेदवार बनाउने टुंगो गरेको हो ।

नेपाली कांग्रेसले गाउँपालिकाको अध्यक्षमा पार्टीका पूर्वमहासमिति सदस्य एवं कांग्रेस मोरङको सल्लाहकार समिति सदस्य बलराम सरदारलाई उम्मेदवार बनाएको छ ।

नेकपा (माओवादी केन्द्र)ले पूर्ववडाध्यक्ष नमोनारायण माझीलाई उम्मेदवार बनाएको छ ।

२०७९ सालको स्थानीय तह निर्वाचनमा कांग्रेसका जयप्रकाश गच्छदार ग्रामथानको अध्यक्ष निर्वाचिन भएका थिए । उनको गत असार ३ गते निधन भएको थियो । गच्छदारको निधनपछि ग्रामथानमा उपनिर्वाचन हुन लागेको हो ।

गत चुनावमा गच्छदारले ७ हजार ६ सय ५ मत पाएका थिए । उनका निकटम प्रतिस्पर्धी एमालेका शिवनारायण माझी थारुले ६ हजार ९३ मत मात्रै ल्याएका थिए ।