उमागौरी सहकारीका सञ्चालकविरुद्ध पक्राउ पूर्जी जारी

विराटनगर । सदस्यको बचत अपचलनको अनुसन्धानका लागि मोरङको धनपालनाथ गाउँपालिका–४ कर्सिया बजारमा रहेको उमागौरी कृषि सहकारी संस्थाका १० जनाविरुद्ध पक्राउ पुर्जी जारी भएको छ ।

सहकारीका शम्भुप्रसाद रौनियारसहित १० जनाविरुद्ध जिल्ला अदालत मोरङले पक्राउ पुर्जी जारी गरेको हो । प्रहरीले सबैको नाम खुलाएको छैन ।

प्रहरी स्रोतका सहकारी ठगी प्रकरणमा जोडिएका नेकपा (एमाले)का नेता एवं संघीय संसदको सार्वजनिक लेखा समिति सभापति ऋषिकेश पोखरेलकी पत्नी अञ्जला कोइरालाको नाम भने पक्राउ पुर्जीमा समावेश छैन ।

२०६८ सालमा स्थापना भएको यो सहकारीमा सांसद पोखरेलकी पत्नी दुई कार्यकाल सञ्चालक समितिमा रहेर काम गरेकी थिइन् । सहकारी संकटमा परेपछि कोइरालाले २०७८ माघ ५ गतेदेखि सहकारीबाट राजीनामा दिइन् । सहकारीबाट राजीनामा दिए पनि उनी सञ्चालक समितिमा रहँदा सहकारीले लिएको ऋण नतिरेका कारण आरएसडीसी लघुवित्त वित्तीय संस्थाले कोइरालासहितका सञ्चालकलाई कालोसूचीमा राखेको छ ।

सहकारीका वर्तमान १० सञ्चालकविरुद्ध जिल्ला अदालत मोरङबाट सहकारीको बचत अपचलन मुद्दामा पक्राउ पुर्जी जारी भएको प्रहरीले जनाएको छ ।

प्रदेश सहकारी रजिष्ट्रार तथा प्रशिक्षण कार्यालयले पठाएको पत्रका आधारमा मुद्दा दर्ता गरेर पक्राउ पुर्जी लिइएको मोरङ प्रहरीका प्रवक्ता डीएसपी वेदप्रकाश जोशीले बताए । प्रहरीले पक्राउ पुर्जी लिए पनि प्रहरी कार्यालयमा उजुरी गर्न सहकारीका बचतकर्ता तथा ऋणी पुगेका छैनन् ।

सर्वाधारणको बचत तथा ऋण अपचलन गरेपछि सहकारीको कार्यालय बन्द छ । सञ्चालकलाई कार्यालय खोल्न आग्रह गर्दा असहयोग गरेपछि प्रहरीले गत कात्तिक १४ गते सटरको ताला फुटाएर कागजात जफत गरेको थियो ।

अनुसन्धानका लागि सहकारी सञ्चालकले असहयोग गरेपछि बन्द रहेको कार्यालयबाट कागजात लगिएको डीएसपी जोशीले बताए । ‘यो घटनामा प्रहरीले अनुसन्धान गरिरहेको छ । त्यहाँ पत्राचार गरियो । समन्वय गर्नपनि खोजियो । तर, कोही सम्पर्कमा नआएपछि रीतपूर्वक प्रक्रिया मिलाएर खानतलासी गरिएको हो । इलाका प्रहरी कार्यालय रंगेलीमार्फत अनुसन्धान भइरहेको छ,’ उनले भने ।

सहकारीका सञ्चालक कार्यालय बन्द गरेर हिँडेपछि कोशी प्रदेश सहकारी रजिष्ट्रार तथा प्रशिक्षण कार्यालयले उमागौरी कृषि सहकारीको विषय अनुसन्धान गर्न प्रहरीलाई पत्राचार गरेको थियो । उमागौरीले विभिन्न बैंक तथा वित्तीय संस्थाबाट ११ करोड ५६ लाख ७८ हजार रुपैयाँ ऋण लिएको देखिन्छ । सहकारीले फिर्ता गर्नुपर्ने बचत २ करोड ३ लाख ५४ हजार १ सय ५६ रुपैयाँ छ ।