पूर्वमन्त्री मनाङे ज्यान मार्ने उद्योग मुद्दामा दोषी ठहर, के हुन्छ सांसद पद ?

काठमाडाैं । गण्डकी प्रदेशका सांसद (प्रदेशसभा सदस्य) एवं पूर्वमन्त्री राजीव गुरुङ (दीपक मनाङे) ज्यान मार्ने उद्योग मुद्दामा दोषी ठहर भएका छन् । २०६१ सालकाे घटनामा सर्वोच्च अदालतका न्यायाधीश नहकुल सुवेदी र टेकप्रसाद ढुंगानाको संयुक्त इजलासले ५ वर्ष कैद गर्ने उच्च अदालत पाटन (तत्कालीन पुनरावेदन अदालत)बाट भएको फैसलालाई सदर गरेको हो ।

अदालतकाे फैसला आएपनि उनी पक्राउ परेका छैनन् ।

प्रदेशसभा सदस्य निर्वाचन ऐन २०७४ अनुसार उनी पदमुक्त हुने सम्भावना छ । ऐनको दफा १६ मा सांसद पदमुक्त हुने प्रावधान छ ।

उक्त दफाको उपदफा २ अनुसार पदमुक्त भएको जानकारी आयोगले सम्बन्धित व्यक्तिलाई दिनुपर्छ । पदमुक्त भएको सूचना नेपाल राजपत्रमा प्रकाशित गरिनेछ ।

मनाङले अब २८ महिना कैद भुक्तान गर्नुपर्ने बताइएकाे छ । उनले यसअघि एक पटक दुई वर्ष र अर्को पटक आठ महिना गरी ३२ महिनाको कैद भुक्तान गरिसकेका छन् ।