छठ मनाउन कोशी प्रदेशमा दुई दिन बिदा

विराटनगर । सूर्यदेवको उपासना गर्दै चार दिनसम्म मनाइने छठ पर्व सुरु भएको छ । आजबाट सुरु भएकाे छठ शुक्रबार उदाउँदो सूर्यलाई अर्घ्य दिएर पर्व समापन हुनेछ ।

पहिलो दिन मंगलबार नहाय खाय मनाइँदैछ । बुधबार खरना पर्व मनाइन्छ । तेस्रो दिन बिहीबार छठको मुख्य दिन हो ।

तेस्रो दिन बिहीबार अस्ताउँदो सूर्यलाई जलाशय किनारबाट अर्घ्य दिने परम्परा छ । अन्तिम दिन शुक्रबार बिहान उदाउँदो सूर्यलाई अर्घ्य दिएपछि छठ पर्वको विधिवत् समापन हुन्छ । तराई मधेशमा छठ पर्वको तयारीले भइरहेको छ । छठको पूजाका लागि बजारमा किनमेलका लागि घुइँचो लागेको छ । नदी, पोखरी तथा जलाशयलाई पनि सजाइएको छ ।

छठ पर्व मनाउनका लागि संघिय सरकारले पर्वको मुख्य दिन बिहीबार सार्वजनिक बिदा दिएको छ ।

कोशी प्रदेश सरकारले भने थप एक दिन बिदा थप गरेको छ ।  कोशी प्रदेश सरकारले प्रदेशका १४ जिल्लामा छठकाे समापनमा शुक्रबार सार्वजनिक बिदा दिएको हो ।

प्रदेशले गत चैत ९ गते नै प्रदेशको आन्तरिक बिदा सम्बन्धि सूचना निकालेको थियो । जसमा छठ पर्वमा उदाउँदो सूर्यलाई अर्घ्य दिएको दिन कात्तिक २३ गते प्रदेशमा सार्वजनिक बिदा दिइएको छ ।

प्रदेश सरकारले २५ गते आइतबार पनि सार्बजनिक बिदा दिएको छ । राष्ट्रिय विभूति फाल्गुनन्दकाे जयन्तीको अवसरमा प्रदेशमा सार्वजनिक बिदा दिएको हो ।