लेबनानमा इजरायलको हमलामा परी थप १९ जनाको मृत्यु

विराटनगर । लेबनानको पूर्वी सहर बालबेकमा इजरायलले आक्रमण गर्दा ८ महिलासहित १९ जनाको मृत्यु भएको छ ।

इजरायली सेनाले बालबेक र आसपासका दुई सहरमा बम हमला गरेको थियो । जसमा परी १९ जनाको मृत्यु भएको लेबनानको स्वास्थ्य मन्त्रालयलाई उद्दत गर्दै १९ जनाको मृत्यु भएको बीबीसीले जनाएको छ । इजरायलले आक्रमण गर्ने भनेपछि सो स्थानका ५० हजार भन्दा बढी मानिसले सहर छाडेर भागेका थिए ।

इजरायली सेनाले दक्षिणी लेबनानमा रहेको बालबेक र नाबातिएहमा रहेको हिजबुल्लाह कमाण्ड र कन्ट्रोल केन्द्र र पूर्वाधारमा आक्रमण गरेको बताएको छ।

सेनाले बालबेक रहेको बेका उपत्यकामा रहेको हिज्बुल्लाह इन्धन डिपोलाई पनि निशाना बनाएको दाबी गरेको छ ।

हिजबुल्लाहका नयाँ महासचिवले आफ्नो नेतृत्वमा समूहले इजरायल विरुद्धको युद्ध जारी राख्ने बताएपछि इजरायलले आक्रमण गरेको बताएको छ ।

महासचिव नियुक्तिपछि नइम कासिमले इजरायली हवाई हमलामा मारिएका आफ्ना पूर्ववर्ती महासचिव हसन नसरल्लाहको एजेन्डा अनुसरण गर्ने बताएका थिए ।

बालबेक सिरियाको सिमानामा रहेको बेका उपत्यकाको प्रमुख जनसंख्या केन्द्र हो ।यो स्थानबाट हिजबुल्लाहले लडाकुहरू भर्ती गर्ने गरेको छ ।