चाेरीका गहनासहित एक जना पक्राउ

विराटनगर । मोरङको बूढीगंगा गाउँपालिका–२ टंकीसिनवारीबाट चोरी गरिएका सुनका गहना र नगदसहित एक जनालाई प्रहरीले शुक्रबार पक्राउ गरेको छ ।

बूढीगंगा–२ का ३१ वर्षीय किशोर खड्कालाई पक्राउ गरिएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए । उनका अनुसार बूढीगंगा–२ का निर्मल बस्नेतको घरबाट बिहीबार राति सुनका गहना र नगद चोरी भएको थियो ।

घरका सबै सुतिरहेका बेला कोठाको दराजभित्र राखिएका डेढ तोलाको सुनको सिक्री, कानमा लगाउने आठ आनाको रिङ, एक तोलाको सुनको औंठी एक जोडी, चार आनाको सुनको पेन्डल र ३० हजार रूपैयाँ नगद चोरी भएको प्रहरीले जनाएको छ ।

कोठाभित्रबाट चोरीमा संलग्नले प्रयोग गरेको मोबाइल फेला परेको डीएसपी जोशीले बताए । ‘सुनका गहना र नगद चाेरी गरेपछि आफ्नो मोबाइल भने त्यही कोठामा छाडेर हिँडेको पाइयो,’ उनले भने, ‘उक्त मोबाइलकै आधारमा चोरीमा संलग्नलाई पक्राउ गर्न प्रहरी सफल भएको हो ।’

चोरी भएका सुनका गहना र नगद २४ हजार २ सय रूपैयाँ खड्काको घरबाट बरामद भएको प्रहरीले जनाएको छ ।