विश्वकप लिग २ : स्कटल्याण्डमाथि नेपालको जित

विराटनगर । विश्वकप लिग–२ अन्तरगत अमेरिकामा जारी सिरिजमा नेपाली क्रिकेट टोलीले स्कटल्याण्डलाई पराजित गरेको छ ।

अमेरिकाको डालसस्थित ग्रान्ड प्रेरि स्टेडियममा स्कटल्याण्डलाई पाँच विकेटले पराजित गरेको हो ।

मङ्गलबार राति टस हारेर पहिलो ब्याटिङ गरेको स्कटल्याण्ड ४१.४ ओभरमा सबै विकेट गुमाउँदै १५४ रनमा समेटिएको थियो ।

स्कटल्याण्डलाई सस्तैमा समेट्ने क्रममा सन्दीप लामिछानेले ३ विकेट लिए । करन केसी, सोमपाल कामी, गुल्सन झाले २–२ विकेट लिए । स्कटल्याण्डका लगि मार्क वाटले ३४ रन बनाए,अन्य ब्याटरले उल्लेखनीय रन बनाउन सकेनन् ।

स्कटल्याण्डले दिएको लक्ष्य नेपालले २९‍.५ ओभरमा पूरा गर्यो । नेपालको जितमा आरिफ शेखले ५१ रन जोडे । साथै कुशल भुर्तेल र गुल्शन झाले २५–२५ रन बनाए भने आसिफ शेखले २१ रन बनाए ।

स्कटल्याण्डका लागि ब्राण्डम म्याकुलमले २ विकेट लिए । साथै ब्राड कुरी, मार्क वाट र ज्याक जार्विसले समान १–१ विकेट लिए । नेपाल पहिलो खेलमा अमेरिकासँग पराजित भएको थियाे । स्कटल्याण्डले पहिलो खेलमै अमेरिकालाई १० विकेटले पराजित गरेको थियो ।