रवि लामिछानेलाई रुपन्देही लैजाने तयारी

पाेखरा । सहकारीको बचत अपचलन आरोपमा पक्राउ परेका पूर्वगृहमन्त्री एवं राष्ट्रिय स्वतन्त्र पार्टीका सभापति रवि लामिछानेलाई रुपन्देही लैजाने तयारी भएको छ ।

संगठित अपराधमा रुपन्देही जिल्ला अदालतबाट अर्को पक्राउ पुर्जी जारी भएपछि उनलाई उतै लैजाने तयारी भएको हो । प्रहरी स्राेतका अनुसार केही दिन  भित्र उनलाई रुपन्देही लगिनेछ ।

कास्की जिल्ला अदालतले बिहीबार  पूर्वगृहमन्त्री लामिछाने र पूर्वडीआइजी छविलाल जोशीलाई थप सात दिन हिरासतमा राखेर अनुसन्धान गर्न अनुमति दिएको  थियाे  । लामिछानेमाथि सम्पत्ति शुद्धीकरणमा पनि अनुसन्धान हुनेछ ।

सहकारी ठगी र सङ्गठित अपराधमा अनुसन्धानमा गरिरहेको प्रहरीले सम्पत्ति शुद्धीकरणको अनुसन्धान पनि एकसाथ लैजाने तयारी गरेको हाे ।

सङ्गठित अपराध अनुसन्धानमा ६० दिन हिरासतमा राख्न मिल्छ । सम्पत्ति शुद्धीकरण ९० दिन थुनामा राखेर अनुसन्धान गर्न सकिन्छ ।

रास्वपा सभापति लामिछाने कात्तिक २ गते पक्राउ परेका थिए ।