प्राधिकरणले काट्यो ४३ उद्योगको लाइन

विराटनगर । नेपाल विद्युत प्राधिकरणले विद्युत महसुल वापतको बक्यौता नबुझाएका ४३ उद्योगको विद्युत् लाइन काटेको छ ।

बिहीबार राति डेटिकेटेड फिडर र ट्रंक लाइन वापतको विद्युतको बक्यौता नबुझाउने ४३ उद्योगको लाइन काटिएको नेपाल विद्युत प्राधिकरणले जानकारी दिएको छ।

गत असोज २४ गते प्राधिकरणले सूचना प्रकाशित गरेर ४९ उद्योगलाई २०७२ माघदेखि २०७५ वैशाखसम्मको डेडिकेटेड फिडर तथा ट्रंक लाइन वापतको बक्यौता बुझाउन ताकेता गरेको थियो ।

बक्यौता तिर्नका लागि कात्तिक ८ गतेसम्मको समय सीमा दिएको थियो । प्राधिकरणका अनुसार बिहीबार मात्रै पाँच उद्योगले बक्यौता वापतको महसुल बुझाएका थिए । नतिर्ने अरु उद्योगको लाइन काटेको हो ।

बिहीबार बिहान बसेको प्राधिकरण बोर्ड बैठकमा ऊर्जा मन्त्री दिपक खड्काले डेडिकेटेड तथा ट्रंक लाइन विवाद दिगो रुपमा समाधान गर्नुपर्ने भन्दै उद्योगीहरूको लाइन तत्काल नकाट्न निर्देशन दिएका थिएका थिए । तर प्राधिकरणका कार्यकारी निर्देशक घिसिङले लाइन काटेका हुन् ।