चिनियाँ नागरिकसँग बालविवाह गराउने ८ जना सुनसरीबाट पक्राउ

विराटनगर । चिनियाँ नागरिकसँग बालविवाह गराउने आठ जनालाई प्रहरीले पक्राउ गरेको छ ।

धनकुटाको छथर जोरपाटी २ की १६ वर्षकी किशोरीलाई चिनियाँ नागरिकसँग जबरजस्ती बालविवाह गराउने किशोरीका बुबासहित ८ जनालाई सुनसरी प्रहरीले पक्राउ गरेको हो ।

जिल्ला प्रहरी कार्यालय सुनसरीका अनुसार किशोरीलाई घरबाट ललाइफकाई चतरास्थित औलिया बाबाको मन्दिरमा लगेर बालविवाह गरिरहेको अवस्थामा प्रहरीले उनीहरूलाई नियन्त्रणमा लिएको हो ।

सो कार्यमा सम्लग्न तीन चिनियाँ नागरिक र ५ नेपालीलाई पक्राउ गरी घटनाको अनुसन्धान अगाडि बढाइएको सुनसरी प्रहरीले जनाएको छ ।

धनकुटा छथर जोरपाटी २ की १६ वर्षकी बालिकालाई चीनको हुबेल बस्ने ३३ वर्षीय लि टेङसँग विबाह गराउँदै गरेको अवस्थामा बेहुलासहितका मानिसहरूलाई पक्राउ गरेको हो ।

प्रहरीले उमेर नपुगेकी छोरीलाई जबरजस्ती विवाह गराउने किशोरीका बाबु, चिनियाँ नागरिक लि टेङ, उदयपुरको बेलका नगरपालिका ९ का ४३ वर्षीय दिपक दर्जी, ४२ वर्षीय बद्रीविक्रम राई, स्याङ्जा पुतलीबजार नगरपालिका १२ का २० वर्षीय सितल गुरुङ, काभ्रेपलान्चोकको रोशी गाउँपालिका ३ की २० वर्षीया रोशनीमाया तामाङ,  चिनियाँ नागरिक ३५ वर्षीय डोङ शिहाओ र वु हेजीलाई पक्राउ गरेको हो ।

किशोरीलाई प्रलोभनमा पारी जबरजस्ती विवाह गरेको पाइएको सुनसरीका प्रहरी प्रमुख एसपी सुमनकुमार तिम्सिनाले बताए । पक्राउ परेका आठै जनालाई जिल्ला अदालत सुनसरीबाट म्याद थप गरि अनुसन्धान थालिएको प्रहरीले जनाएको छ ।