माेरङका नयाँ प्रहरी प्रमुख भन्छन्, ‘प्रहरीकाे जिम्मेवारी अनुसार काम गर्छु’

विराटनगर । मोरङ प्रहरी प्रमुख एसपी (प्रहरी उपरीक्षक) काे जिम्मेवारीमा आएका नारायणप्रसाद चिमरियाले आफूसँग कुनै नयाँ योजना नरहेको बताएका छन् ।

बुधबार जिल्ला प्रहरी कार्यालयमा पत्रकार भेटघाट कार्यक्रमको आयोजना गर्दै उनले आफुसँग छुट्टै याेजना नरहेकाे बताएका हुन् । उनले प्रहरीकाे जिम्मेवारी अनुसार काम गर्ने बताए ।

‘मेरो नयाँ केही योजना छैन । प्रचालित कानुनअनुसार काम गर्छु,’ उनले भने,’ शान्ति सुरक्षा, अपराध नियन्त्रण र अनुसन्धानमा विभागीय एवं संगठनको नीतिभन्दा बाहिर गएर काम गर्दिन ।’

 ‘समस्याको पहिचान गर्दै त्यहीअनुसारको योजना बनाएर काम गरिने छ,’ उनले भने, ‘पीडित र नागरिकमैत्री सेवा प्रवाहमा जोड दिइने छ ।’ उनले आफ्नो कार्यकालमा विवादरहित भएर काम गर्ने प्रतिबद्धतासमेत जनाए ।

मोरङमा शान्ति सुरक्षा, अपराध नियन्त्रण र अनुसन्धानमा देखिने समस्याहरु केलाउने काम आफूले गरिरहेको उनले बताए । ‘यहाँ ठाउँअनुसारका धेरै समस्याहरु छन् । तिनका बारेमा सबै पक्षबाट जानकारी लिने काम गरिरहेको छु,’ चिमरियाले भने,‘समस्याको समाधान गर्ने गरी योजना बनाएर अघि बढ्छु । यसमा सबैको साथ र सहयोग आवश्यक छ ।’

माेरङ प्रहरी प्रमुख नवराज कार्की आर्थिक लेनदेन विवादमा तानिएपछि चिमरिया काजमा सोमबार मोरङ हाजिर भएका थिए ।